"گل کوئی عشق دی کر پیار دا قصہ سنا" ساغر صدیقی

گل کوئی عشقِ دی کر پیار دا قصہ سنا
داستاں منصور دی یا دار دا قصہ سنا

چھڈ گُنجل دار زلفاں دی بجھارت شاعرا
انقلابِ وقت دی جھنکار دا قصہ سنا

اج وارث دے قلم دی سرسراہٹ نوں بُلا
ابن قاسم دی جری تلوار دا قصہ سنا

جتھے پی کے کجھ شرابی غیرتاں نئیں دیچدے
ساقیا اوس محفلِ سرشار دا قصہ سنا

اج سوہنی تے گھڑے دے قول دا افسانہ لکھ
مڑ کے عزت بیگ دے اقرار دا قصہ سنا

جتھے کھڑکے پھل امیداں دے نئیں کملاؤندے
اوس خزاں نا آشنا گلزار دا قصہ سنا

چھیڑ ساغرؔ و نجھلی تے دل دا اک انمول گیت
بن کے رانجھا حسن دی سرکار دا قصہ سنا
ساغرؔ صدیقی
 
Top