ساغر صدیقی تیری دنیا میں یا رب زیست کے سامان جلتے ہیں۔۔۔ ساغر

تیری دنیا میں یا رب زیست کے سامان جلتے ہیں
فریبِ زندگی کی آگ میں انسان جلتے ہیں

دلوں میں عظمتِ توحید کے دیپک فسردہ ہیں
جبینوں پر ریا و کبِر کے فرمان جلتے ہیں

ہوس کی باریابی ہے خِرد مندوں کی محفل میں
روپہلی ٹکلیوں کی اوٹ میں ایمان جلتے ہیں

حوادث رقص فرما ہیں،قیامت مسکراتی ہے
سنا ہے نا خدا کے نام سے طوفان جلتے ہیں

شگوفے جھولتے ہیں اس چمن میں بھوک کے جھولے
بہاروں میں نشیمن تو بہر عنوان جلتے ہیں

کہیں پازیب کی چھن چھن میں مجبوری تڑ پتی ہے
ریا دم توڑ دیتی ہے ،سنہرے دان جلتے ہیں

مناؤ جشنِ مے نوشی،بکھیرو زلفِ مے خانہ
عبادت سے تو ساغر دہر کے شیطان جلتے ہیں

واہ واہ ساغر صدیقی کی کیا ہی خوبصورت غزل ہے۔ بہت شکریہ

شکریہ @ فاتح بھائی۔

مناٶ جشن مے نوشی؛ بکھیرو زلف مے خانہ
عبادت سےتوساغر دہرکے شیطان جلتے ہیں

واہ مزہ آگیا