عشق کچھ ایسی گدائی ھے کہ سبحان اللہ

Qaisar Aziz

محفلین
جناب رحمان فارس

عشق کچھ ایسی گدائی ھے کہ سبحان اللہ
ھم نے خیرات وہ پائی ھے کہ سبحان اللہ !!!

پاؤں پڑتا ھوں تو وہ ھنس کے لگاتا ھے گلے
بندگی میں وہ خدائی ھے کہ سبحان اللہ !!!

شام ھوتے ھی کسی بھُولے ھوئے غم کی مہک
صحن میں یُوں اُتر آئی ھے کہ سبحان اللہ۔۔۔ !!!

آنکھ اُٹھا کر مَیں ترے عارض و لب کیا دیکھوں
پاؤں ھی ایسا حنائی ھے کہ سبحان اللہ !!

چہرے پڑھتا ھوں ، کتابیں نہیں پڑھتا اب مَیں
یہ پڑھائی ، وہ پڑھائی ھے کہ سبحان اللہ ۔۔ !!

پا بہ گِل ھوں مگر اُڑتا ھوں مَیں خوشبو بن کر
قید میں ایسی رھائی ھے کہ سبحان اللہ !!!

اک گلِ _تر سے ٹپکتی ھوئی شبنم نے مُجھے
آنکھ وہ یاد دلائی ھے کہ سبحان اللہ ۔۔۔۔۔۔۔!!!!!

چھونے والا بھی مہکتا ھی چلا جاتا ھے ۔۔۔ !!
ایسی کلیوں سی کلائی ھے کہ سبحان اللہ

سب کی آنکھوں سے بچا کر کسی شرمیلے نے
ھم سے یوں آنکھ ملائی ھے کہ سبحان اللہ !!

دِل چُراتا ھے وہ کم بخت بِنا آھٹ کے ۔۔۔۔۔۔ !!!
.ھاتھ میں ایسی صفائی ھے کہ سبحان اللہ

آج اِک شوخ نے صاحب! مجھے میری ھی غزل
ایسے شرما کے سُنائی ھے کہ سبحان اللہ !!

ھنستے گاتے ھوئے فارس کی اُداس آنکھوں میں
.ایسی خاموش دُھائی ھے کہ سُبحان اللہ ۔۔۔۔!!!!
 
Top