سفر کی داستاں ہوتے ہوئے بھی

Qaisar Aziz

محفلین
سفر کی داستاں ہوتے ہوئے بھی
زباں چُپ ہے زباں ہوتے ہوئے بھی

تمنا ہے کوئی ہو دوست اپنا
ہجومِ دوستاں ہوتے ہوئے بھی

کہاں ہو دیدہ و دل کے مکینو
نہیں ہو تم یہاں ہوتے ہوئے بھی

کسی کا عکس روشن ہے کہیں پر
بہر سُو اک دھواں ہوتے ہوئے بھی

کوئی چہرہ دکھائی دے رہا ہے
غبارِ بے کراں ہوتے ہوئے بھی

وجود جسم و جاں کو ڈھونڈتا ہوں
وجودِ جسم و جاں ہوتے ہوئے بھی

بجے جاتا ہے سازِ رائیگانی
سکوتِ ناگہاں ہوتے ہوئے بھی

بڑھے جاتی ہے ویرانی دلوں کی
گھروں میں کھڑکیاں ہوتے ہوئے بھی

یہاں پر میرِ خستہ کی سند ہے
ترے غالب بیاں ہوتے ہوئے بھی

حمادؔ نیازی
 
Top