لفظِ ”اردو“ پر مشتمل اشعار پیش کریں(کسی بھی زبان کے)

[محمد وارث]

ارے واہ بہت خوب۔
دوسرے مصرع میں وزن کا مسئلہ لگ رہا ہے یا میرا وہم ہے۔
اگر "بگزر" ہو اور گ کو ساکن اور ر کو متحرک پڑھا جائے تب شاید وزن درست ہوگا۔

آپ نے درست فرمایا، لکھنے مین غلطی ہوئی، معذرت خواہ ہوں، اور درست بھی کر رہا ہوں۔

 

[جاسمن]

سب میرے چاہنے والے ہیں، میرا کوئی نہیں
میں بھی اِس ملک میں اُردُو کی طرح رہتا ہوں
حسن کاظمی

 

[فاتح]

عجیب۔۔۔۔
یعنی شعر میں زبانِ اردو کے لیے اردو کا لفظ سب سے پہلے مصحفی نے کہا۔
کیا نثر میں اس سے پہلے یہ لفظ اردو زبان کے لیے طے کیا جاچکا تھا یا ریختہ کو اردو کا نام دیا ہی مصحفی نے ہے؟

ہمیں ہمارے اردو کے پروفیسر صاحب نے بتایا تھا کہ اردو شاعری میں لفظ اردو برائے اردو زبان پہلی مرتبہ مصحفی نے مذکورہ بالا شعر میں استعمال کیا تھا۔ ہم آپ کی طرح لائق نہیں تھے ورنہ نثر میں استعمال کے متعلق بھی پوچھ لیتے ان سے لیکن اب تو وہ وفات پا چکے سو پوچھنا ممکن نہیں۔ ہاں! ہمارا اپنا قیاس ہے کہ نثر میں پہلے بھی استعمال ہو رہا ہو گا۔ کیونکہ غالب کا ایک فارسی شعر برادرم محمد وارث نے درج کیا ہے جس میں اردو بطور اردو زبان استعمال ہوا ہے اور غالب کا دور مصحفی کے فوراً بعد کا دور ہے اور بظاہر ایسا نہیں لگتا کہ ایک فردِ واحد کسی زبان کو ایک نام دے اور فوراً ہی وہ قبول عام کی سند پا لے۔

 

[فاتح]

یارانِ خوش مذاق نے اللہ کی پناہ
اردو کو بے قصور مسلمان کر دیا
(منور رانا )​

 

[فاتح]

وہ اردو کیا ہے، یہ ہندی زباں ہے
کہ جس کا قائل اب سارا جہاں ہے
(مراد شاہ)​

کچھ لوگوں کے خیال میں یہ وہ پہلا اردو شعر ہے جس میں لفظ اردو بطور اردو زبان کے آیا ہے۔ یاد رہے کہ مراد شاہ اور مصحفی کا دور تقریباً ایک ہی ہے۔

 

[فاتح]

وہ گُلِ رنگیں ترا رخصت مثالِ بُو ہوا
آہ! خالی داغؔ سے کاشانۂ اُردو ہوا
(اقبال)​

 

[فاتح]

یا باہم پیار کے جلسے تھے، دستورِ محبت قائم تھا
یا بحث میں اُردو ہندی ہے یا قربانی یا جھٹکا ہے
(اقبال)​

 

[فاتح]

کس قدر نرم سی نازک سی ہے اردو کی طرح
صرف محسوس کیا کر اسے خوشبو کی طرح
منصور آفاق​

 

[جاسمن]

بہت خوب فاتح بھائی!

 

[یوسف سلطان]

سیکڑوں اور بھی دنیا میں زبانیں ہیں مگر
جس پہ مرتی ہے فصاحت وہ زباں ہے اردو
(نا معلوم)

 

[محمد اسامہ سَرسَری]

ہمیں ہمارے اردو کے پروفیسر صاحب نے بتایا تھا کہ اردو شاعری میں لفظ اردو برائے اردو زبان پہلی مرتبہ مصحفی نے مذکورہ بالا شعر میں استعمال کیا تھا۔ ہم آپ کی طرح لائق نہیں تھے ورنہ نثر میں استعمال کے متعلق بھی پوچھ لیتے ان سے لیکن اب تو وہ وفات پا چکے سو پوچھنا ممکن نہیں۔ ہاں! ہمارا اپنا قیاس ہے کہ نثر میں پہلے بھی استعمال ہو رہا ہو گا۔ کیونکہ غالب کا ایک فارسی شعر برادرم محمد وارث نے درج کیا ہے جس میں اردو بطور اردو زبان استعمال ہوا ہے اور غالب کا دور مصحفی کے فوراً بعد کا دور ہے اور بظاہر ایسا نہیں لگتا کہ ایک فردِ واحد کسی زبان کو ایک نام دے اور فوراً ہی وہ قبول عام کی سند پا لے۔

جزاک اللہ خیرا۔

 

[آوازِ دوست]

کہہ دو کہ نہ شکوہ لب مغموم سے نکلے
اُردو کا جنازہ ہے ذرا دھوم سے نکلے
رئیس امروہی

 

[فاتح]

فضا کیسی بھی ہو وہ رنگ اپنا گھول لیتا ہے
سلیقے سے زمانے میں جو اردو بول لیتا ہے
سلیمؔ صدیقی​

 

[فاتح]

سلیقے سے ہواؤں میں جو خوشبو گھول سکتے ہیں
ابھی کچھ لوگ باقی ہیں جو اردو بول سکتے ہیں
(نامعلوم)​

 

[فاتح]

مرے کانوں میں مصری گھولتا ہے
کوئی بچہ جب اردو بولتا ہے
(مشتاق دربھنگوی)​

 

[آوازِ دوست]

سلیقے سے ہواؤں میں جو خوشبو گھول سکتے ہیں
ابھی کچھ لوگ باقی ہیں جو اردو بول سکتے ہیں
(نامعلوم)​

یہ تو پہلے والے شعر کا ہی کان مروڑا گیا ہے

 

[آوازِ دوست]

مرے کانوں میں مصری گھولتا ہے
کوئی بچہ جب اردو بولتا ہے
(مشتاق دربھنگوی)​

اور اگر بچہ اُردو لکھنے لگے تو؟

 

[فاتح]

یہ تو پہلے والے شعر کا ہی کان مروڑا گیا ہے

لگ تو واقعی کچھ ایسا ہی رہا ہے لیکن کچھ کہا نہیں جا سکتا کہ کون سا شعر کس کا سرقہ ہے۔ دوسرے شعر کے خالق کا نام ہی نہیں معلوم فی الحال ورنہ دونوں شعرا کے زمانوں کے فرق سے اندازہ لگایا جا سکتا تھا

 

[فاتح]

ناز و انداز میں شائستہ سا وہ حسنِ نفیس
ہُو بہُو جانِ غزل ہے مری اردو کی طرح
عطا تراب​

 

[فاتح]

اور اگر بچہ اُردو لکھنے لگے تو؟

پھر شاید آنکھوں میں مصری گھولے گا