سارا ٹبر پی لیندا سی، پائیا دودھ دی چاء

کدھر ٹُر گیا دور پرانا، پے گیا کہیڑی راہ
سارا ٹبر پی لیندا سی، پائیا دودھ دی چاء

اودوں مشینی دور وی نہیں سی،
شہراں دے وچ شور وی نہیں سی،
اینے ڈاکو چور وی نہیں سی،
سی اکھاں اچ حیا۔۔۔
کدھر ٹُر گیا دور پرانا، پے گیا کہیڑی راہ

جدوں کتھے پروہنا آنا،
اودوں گوشت گھار پکونا،
سب نوں آنی بوٹی بوٹی،
کسے نوں وڈی کسے نوں چھوٹی،
تے جا پروہنے ماں نوں دسنا،
ماسی کیتا اے وا وا چاء،
کدھر ٹُر گیا دور پرانا، پے گیا کہیڑی راہ

اودوں کزن سیاپا نہیں سی،
آنٹی انکل پاپا نہیں سی،
ایڈے چٹے خون نہیں سی،
کڑیاں دے کول فون نہیں سی،
عزت والے یار ہوندے سی یاراں دے،
سوہنے ہوندے گھنڈ سی مٹیاراں دے،
چھوٹے وِیر سی وِیرے ہوندے،
تے وڈے ہونے بھاء،
کدھر ٹُر گیا دور پرانا، پے گیا کہیڑی راہ

اودوں دنیا مر نہیں گئی سی،
جدوں شوارمہ بوتل نہیں سی،
باقی سب خوراکاں صحیح سی،
کھا کے دنیا واندی کئی سی،
زلفی رل کے سارے بہن بھرا،
سارا ٹبر پی لیندے ساں کھلے دودھ دی چاء
کدھر ٹُر گیا دور پرانا، پے گیا کہیڑی راہ

۔۔۔۔

(علی زلفی)

​