فارسی شاعری خوبصورت فارسی اشعار مع اردو ترجمہ

[حسان خان]

از تو باشد گر همه رویِ زمین از خود مدان
کآنچه داد امروز، فردا می‌سِتانَد روزگار
(صائب تبریزی)
اگر تمام رُوئے زمین تمہارا ہو جائے [تو بھی اُسے] اپنا مت جاننا۔۔۔ کیونکہ زمانہ جو چیز اِمروز دیتا ہے، [اُسے] فردا واپس لے لیتا ہے۔
× اِمروز = آج؛ × فردا = آیندہ کل

 

[حسان خان]

سعدی شیرازی اپنی ایک حمدیہ غزل میں کہتے ہیں:
غوغایِ عارفان و تمنّایِ عاشقان
حرصِ بهشت نیست که شوقِ لِقایِ توست
(سعدی شیرازی)
عارفوں کا شور و غوغا اور عاشقوں کی تمنّا حِرصِ بہشت نہیں ہے بلکہ تمہارے دیدار کا شوق ہے۔

 

[لاریب مرزا]

(مترجم: عین بیخود)

یہ محترم کون ہیں؟؟

 

[حسان خان]

یہ محترم کون ہیں؟؟

یہ محترم فیس بُک پر فارسی ابیات کے ترجمے پیش کرتے ہیں، اور خود ایک صفحہ بھی چلا رہے ہیں:
فارسی شاعری اردو ترجمہ کے ساتھ

 

[حسان خان]

سعدی شیرازی اپنی ایک حمدیہ غزل میں کہتے ہیں:
سعدی ثنایِ تو نتواند به شرح گفت
خاموشی از ثنایِ تو حدِّ ثنایِ توست
(سعدی شیرازی)
سعدی تمہاری ثنا تفصیل سے نہیں کہہ سکتا؛ تمہاری ثنا سے خاموشی [اختیار کر لینا] تمہاری ثنا کی حدّ ہے۔

 

[اریب آغا ناشناس]

اس مشہور شعر کو امروز میں نے اکبر الہ آبادی کی کلیات میں دیکھا ہے؛۔
حیف در چشم زدن صحبتِ یار آخر شد
رویِ گل سیر ندیدم بهار آخر شد
افسوس چشم زدن میں یار کی صحبت اختتام پذیر ہوگئی۔۔چہرہء گل کے دیدار سے سیراب نہیں ہوا اور بہار اختتام پذیر ہوگئی۔

 

[حسان خان]

اس مشہور شعر کو آج میں نے اکبر الہ آبادی کی کلیات میں دیکھا ہے؛۔
حیف در چشم زدن صحبتِ یار آخر شد
رویِ گل سیر ندیدم بهار آخر شد
افسوس چشم زدن میں یار کی صحبت اختتام پذیر ہوگئی۔۔چہرہء گل کے دیدار سے سیراب نہیں ہوا اور بہار اختتام پذیر ہوگئی۔

میرا گمان ہے کہ یہ اکبر الٰہ آبادی کی بیت نہیں ہے، بلکہ اُنہوں نے کہیں اِس کا اقتباس لیا ہو گا۔

 

[عین احمد]

الله الله --حسان بھائی ماشاء الله اشار کی بہت خوبصورت تشریح کی ہے آپ نے -

 

[لاریب مرزا]

یہ محترم فیس بُک پر فارسی ابیات کے ترجمے پیش کرتے ہیں، اور خود ایک صفحہ بھی چلا رہے ہیں:
فارسی شاعری اردو ترجمہ کے ساتھ

حسان خان کیا آپ بھی فیس بک پہ فارسی شاعری اور اس کے ترجمے کا کوئی صفحہ چلا رہے ہیں؟؟

 

[محمدظہیر]

حسان خان کیا آپ بھی فیس بک پہ فارسی شاعری اور اس کے ترجمے کا کوئی صفحہ چلا رہے ہیں؟؟

نقش ہائے رنگ رنگ
محمد وارث صاحب کی دستخط میں یہ صفحہ ہے، کیا اس کی بات کر رہی ہیں؟

 

[محمدظہیر]

انگشت نمائے خلق بُودن
زِشت است و لیک با تو زیباست

شیخ سعدی شیرازی

لوگوں کی اُنگلیوں کا نشانہ ہونا (یعنی جس کی طرف اُنگلیاں اُٹھ رہی ہوں) بہت بُری اور بدنما چیز ہے لیکن اگر تُو ساتھ ہو تو پھر یہ بہت خوبصورت بات ہے۔

اس شعر کو پڑھ کر یہ گیت یاد آیا

 

[حسان خان]

حسان خان کیا آپ بھی فیس بک پہ فارسی شاعری اور اس کے ترجمے کا کوئی صفحہ چلا رہے ہیں؟؟

جی، جنابِ محمد وارث کی طرح فیس بُک پر میرا بھی فارسی شاعری کا صفحہ موجود ہے:
فارسی شاعری مع اردو ترجمہ

 

[لاریب مرزا]

جی، جنابِ محمد وارث کی طرح فیس بُک پر میرا بھی فارسی شاعری کا صفحہ موجود ہے:
فارسی شاعری مع اردو ترجمہ

فیس بک پہ ہم نے فارسی شاعری کا یہ صفحہ کافی عرصہ سے پسند کر رکھا ہے۔ کچھ عرصہ قبل ہم نے ایک فارسی شعر مع ترجمہ شریک محفل کیا تھا۔ وہ دراصل اسی صفحے سے لیا تھا۔
فارسی شاعری - نظیری نیشابوری (فارسی کلام مع ترجمہ)
آپ کی کاوش عمدہ ہے۔

نقش ہائے رنگ رنگ
محمد وارث صاحب کی دستخط میں یہ صفحہ ہے، کیا اس کی بات کر رہی ہیں؟

شکریہ محمدظہیر یہ صفحہ ابھی نظر سے نہیں گزرا۔ اب یقینا دیکھیں گے۔

 

[حسان خان]

هر بار حدیثِ غم کنم سَمْع
از دیدهٔ من همی‌رود دَمْع
(عدیم غوری)
میں جب بھی حدیثِ غم سنتا ہوں، میرے دیدے سے اشک بہنے لگتے ہیں۔
× شاعر کا تعلق افغانستان سے ہے۔

 

[حسان خان]

بی تو چراغِ دیدهٔ من بی‌فُروغ شد
یعنی برایِ دیدنِ من دیر شد نیا
(فردوس اعظم)
تمہارے بغیر میری چشم کا چراغ بے نور ہو گیا؛ یعنی [اب] میرے دیکھنے کے لیے دیر ہو چکی ہے، مت آؤ!
× شاعر کا تعلق تاجکستان سے ہے۔

 

[حسان خان]

عثمانی شاعر 'نفعی ارضرومی' مولانا جلال‌الدین رومی کی مدح میں کہتے ہیں:
"سرچشمهٔ فیضِ ازلی مولویِ روم
کز وَی عرب و هند و عجم بهره‌ور آمد
علامهٔ اسرارِ الٰهی که کلامش
چون آیتِ مُنزَل همه جا معتبر آمد"
(نفعی ارضرومی)
مولویِ رومی فیضِ ازلی کا سرچشمہ ہیں، کہ جن سے عرب و ہند و عجم بہرہ ور ہوئے ہیں۔
وہ علّامۂ اَسرارِ الٰہی ہیں، کہ جن کا کلام نازل شدہ آیت کی طرح ہر جا معتبر ہو گیا۔

 

[حسان خان]

عثمانی شاعر 'نفعی ارضرومی' مولانا جلال‌الدین رومی کی مدح میں کہتے ہیں:
(رباعی)
المِنّة لله که دلم گویا شد
یک قطرهٔ ناچیز ببین دریا شد
زان رو که ثناگو شده مولانا را
اندیشه تجلّی‌کدهٔ مولا شد
(نفعی ارضرومی)
الحمدللہ کہ میرا دل گویا ہو گیا؛ ایک قطرۂ ناچیز کو دیکھو کہ دریا ہو گیا؛ چونکہ [میری] فکر مولانا [رومی] کی ثنا گو ہوئی؛ وہ تجلّی کدۂ مولا ہو گئی۔

 

[حسان خان]

عثمانی شاعر 'نفعی ارضرومی' مولانا جلال‌الدین رومی کے فرزند بهاءالدین محمد سلطان وَلَد کی مدح میں کہتے ہیں:
(رباعی)
سلطان وَلَد آن پادشهِ عالَمِ دل
استادِ دل و جانِ دل و هم‌دمِ دل
این فخر نه بس حضرتِ مولانا را
کز صُلبِ وی آمد این چنین محرَمِ دل
(نفعی ارضرومی)
سلطان وَلَد، پادشاہِ عالَمِ دل، استادِ دل، جانِ دل، اور ہمدمِ دل ہیں۔۔۔ حضرتِ مولانا رومی کے لیے یہ افتخار بے حد ہے کہ اُن کی پشت سے ایسا مَحرمِ دل آیا۔

 

[حسان خان]

فراقِ پیرِ کنعانی ز حد افزون شده این دم
رسولِ مصر کُو تا وَی برایش پیرهن آرد
(عدیم غوری)
پیرِ کنعان (حضرتِ یعقوب) کا فراق اِس لمحہ حد سے افزُوں ہو گیا ہے؛ قاصدِ مصر کہاں ہے تا وہ اُن کے لیے [حضرتِ یوسف کا] پیرہن لے آئے؟

 

[حسان خان]

هزارا‌ن جان فدا آن نامه‌ای را
که اندر صدرِ آن نامِ تو باشد
(عدیم غوری)
جس مکتوب کے اوّل میں تمہارا نام ہو، اُس [مکتوب] پر ہزاروں جانیں فدا ہوں!