اردوویب بلاگ

Dear friends, AssalamOAlaikum

I briefly wrote about the potential offered by user scripting in this post on the Mehfil forum and and I told that I would be experimenting with user scripting on google’s web page. My aim was to test the possibility of integrating Udu WebPad in other web pages. I am presenting the results of my expermientation in this post. The results of this particular experiement may not seem earth shattering, but this can considered as a proof of concept. This can have a far reaching effect on the way we write and use web applications. Thanks to user scripting, now We are able to mould web applications the way we like. We have, thus, the possibility of adding support of Urdu in web applications instead of waiting for ever for the others to provide it. Please note that the results presented in this article apply only to FireFox. You will need to install the FireFox extension Greasemonkey before you can use the user script presented here. I have tested this user script on FireFox 1.5 with Greasemonkey 0.64.

عزیز دوستو، السلام علیکم

میں نے محفل فورم پر اس پوسٹ میں یوزر سکرپٹنگ کا تعارف پیش کیا تھا اور بتایا تھا کہ میں گوگل کے ویب پیج پر یوزر سکرپٹنگ کے تجربات کر رہا ہوں۔ میں گوگل کے ویب پیج پر اردو ویب پیڈ کی انٹگریشن کا تجربہ کرنا چاہتا تھا۔ اس پوسٹ میں میں آپ کو اپنے نتائج سے آگاہ کروں گا۔ ان نتائج کی افادیت اگر بظاہر زیادہ نہیں لگتی لیکن اسے ایک proof of concept کے طور پر دیکھا جا سکتا ہے۔ بجائے اس کے کہ ہم انٹرنیٹ کے کاربرداران کا انتظار کرتے رہیں کہ وہ کبھی اردو کو سپورٹ کریں، ہم خود سے آگے بڑھ کر یوزر سکرپٹنگ کے ذریعے ویب اپلیکیشنز کا کنٹرول سنبھال سکتے ہیں۔ واضح رہے کہ اس پوسٹ میں پیش کیے گئے نتائج کا اطلاق فائر فاکس براؤزر پر ہوتا ہے۔ یہاں پیش کی گئی یوزر سکرپٹ استعمال کرنے سے قبل آپ کو فائرفاکس کی ایکسٹنشن
گریز مونکی انسٹال کرنا ہو گی۔ میں نے اس یوزر سکرپٹ کو فائر فاکس 1.5 اور گریز مونکی 0.64 پر ٹیسٹ کیا ہے۔

جیسا کہ میں اپنی گزشتہ پوسٹ میں عرض کرچکا ہوں، جاوا سکرپٹ میں لکھی گئی یوزر سکرپٹ کے ذریعے ہم براؤزر میں ڈسپلے ہونے والے ویب پیج کے تمام خواص کو کنٹرول کر سکتے ہیں۔ یہی آئیڈیا میں نے گوگل کے ویب پیج پر آزمانے کا سوچا۔ میرا آئیڈیا یہ تھا کہ کسی طرح گوگل کے پیج پر موجود ٹیکسٹ باکس پر اردو ویب پیڈ کو انٹگریٹ کر دیا جائے۔ یہ کام اگرچہ بہت زیادہ مشکل نہیں ثابت ہوا لیکن پھر بھی اس میں وقت لگا۔ اردو ویب پیڈ آئی ڈیز کے ساتھ کام کرتا ہے جبکہ گوگل کے پیج پر کسی ایچ ٹی ایم ایل ایلیمنٹ کی آئی ڈی موجود نہیں ہے۔ اسکے علاوہ بھی مجھے ویب پیڈ کی جاوا سکرپٹ میں کئی تبدیلیاں کرنی پڑیں، تب کہیں جا کر یہ یوزر سکرپٹ صحیح چلی۔

جب آپ فائر فاکس اور گریز مونکی انسٹال کرچکے ہوں تو یہاں فراہم کی گئی یوزر سکرپٹ کو ڈاؤنلوڈ کرکے ان زپ کریں اور اس جاوا سکرپٹ فائل کو فائرفاکس کے ذریعے کھولیں۔ اس پر گریز مونکی آپ کو اسے انسٹال کرنے کے لیے کہے گا۔ آپ انسٹال کا بٹن کلک کریں اور یہ یوزر سکرپٹ انسٹال ہو جائے گی۔ اس کے بعد آپ گوگل کے ویب پیج پر جائیں۔ اس کا ٹیکسٹ باکس آپ کو ذیل کی تصویر کی طرح بنفشی پس منظر کے ساتھ نظر آئے گا۔

میں نے اس سکرپٹ کا ڈیفالٹ انگریزی ہی رکھا ہے کیونکہ زیادہ تر آپ انگریزی، یا دوسری رومن زبانوں میں ہی تلاش کرتے ہیں۔ جب آپ کا دل چاہے، آپ CTRL+Space پریس کرکے اردو میں سویچ کر سکتے ہیں جیسا کہ ذیل کی تصویر میں دکھایا گیا ہے اور یوں گوگل پر اردو میں سرچ کرنا آپ کے لیے انتہائی آسان ہو گیا ہے۔

آپ نوٹ کریں گے کہ لینگویج سویچ کرنے کے ساتھ ٹیکسٹ باکس کی الائنمنٹ بھی تبدیل ہوتی ہے۔ میں نے ٹاہوما فونٹ کا استعمال کیا ہے۔ میرے پاس فائر فاکس میں اردو نسخ ایشیا ٹائپ فونٹ صحیح نہیں چل رہا تھا۔ آپ چاہیں تو اس سکرپٹ کو ایڈٹ کرکے اپنی مرضی کا فونٹ استعمال کر سکتے ہیں۔ ابھی اس یوزر سکرپٹ میں آن سکرین کی بورڈ نہیں شامل کیا گیا۔

گوگل کا ویب پیج سادہ ترین ہے اور اسی لیے اس پر تجربات آسانی سے ممکن بھی تھے۔ اس کے مقابلے پر جی میل کا پیج سٹرکچر خاصا پیچیدہ ہے اور اس پر کام کرنے سے پہلے اس کے متعلق کافی معلومات اکٹھا کرنے کی ضرورت ہے۔ پھر بھی ایک تجربے کی کامیابی سے امید کی ایک کرن نظر تو آئی ہے۔ میرا یہ کام کرنے کا مقصد لوگوں میں یوزر سکرپٹنگ کے ممکنات سے متعلق دلچسپی اجاگر کرنا بھی تھا۔ یہ ایسی ٹیکنالوجی ہے جس کے مناسب استعمال سے ہم انٹرنیٹ پر اردو کو بہت موثر انداز میں استعمال کر سکتے ہیں۔

اس یوزر سکرپٹ کے لکھنے میں مجھے ذیل کے ٹولز سے خاطر خواہ مدد ملی:

DOM Inspector
Javascript Shell

آپ لوگ اس یوزر سکرپٹ کو استعمال کریں اور مجھے اپنی آراء سے آگاہ کریں۔

والسلام

اردو گوگل یوزر سکرپٹ ڈاؤنلوڈ کریں

عزیز دوستو، السلام علیکم

میں نے سوچا ہے کہ اس بلاگ کے توسط سے آپ کو اردو ویب پر رونما ہونے والی نئی تبدیلیوں سے آگاہ رکھا جائے۔

روابط کی ڈائریکٹری

محفل فورم پر بالخصوص اردو سے متعلقہ ویب روابط اکٹھے کرنے کے لیے ایک لنکس منیجر انسٹال کر دیا گیا ہے۔ اس میں کٹیگریز اور سب کٹیگریز کا اضافہ کیا جاتا رہے گا۔ آپ لوگوں سے درخواست ہے کہ آپ کو جن مفید روابط کا علم ہو انہیں اس روابط کی ڈائریکٹری میں شامل کریں۔ کم از کم اردو بلاگر حضرات کو اپنے بلاگ کے روابط اردو بلاگ کے زمرہ میں شامل کردینے چاہییں۔

ڈاؤنلوڈ منیجر

ایک اور اہم اطلاع یہ ہے کہ محفل فورم پر اب ایک ڈاؤنلوڈ منیجر موجود ہے۔ میں نے اپنے لکھے ہوئے ذیل کے تمام اوپن سورس پروگرام یہاں اپلوڈ کر دیے ہیں:

اردو ایڈیٹر
اردو ایڈیٹر لائٹ
اردو ویب پیڈ
اردو اوپن پیڈ

روابط کی ڈائریکٹری کی طرح یہاں بھی کٹیگریز اور سب کٹیگریز کا اضافہ کیا جاتا رہے گا۔ محفل فورم پر رجسٹرڈ ارکان یہاں مزید فائلیں اپلوڈ کر سکتے ہیں۔ مجھے امید ہے کہ وقت گزرے کے ساتھ ساتھ یہ اردو سے متعلقہ سوفٹویر کی اچھا ریسورس بن جائے گا۔

اردو ڈیجیٹل لائبریری

کچھ عرصہ قبل میں نے یہاں ایک پوسٹ میں اردو کی کتب ٹائپ کرنے کے بارے میں ایک مشترکہ کاوش شروع کرنے کا ذکر کیا تھا۔ اگر چہ یہ کام ابھی سست رفتاری سے چل رہا ہے لیکن ہمارے دوست شاکر عزیز بہت مستقل مزاجی سے اسے سنبھالے ہوئے ہیں۔ انہوں نے عبدالحلیم شرر کی تصنیف فردوس بریں کے چند ابواب ایک بلاگ کی صورت میں آن لائن بھی رکھ دیے ہیں۔ ابھی تک ہم نے کسی باقاعدہ ڈیجیٹل لائبریری سسٹم کا استعمال شروع نہیں کیا لیکن مواد کی مقدار بڑھنے کے ساتھ ساتھ کسی بہتر نظام کا انتخاب بھی کر لیا جائے گا۔ اس کے علاوہ ایک مانے ہوئے مصنف ایم-مبین صاحب نے بھی اپنا افسانوں کا مجموعہ ٹوٹی چھت کا مکان بھی ہمیں عنایت فرما دیا ہے۔

سلیش نیوز

محفل فورم پر اعلانات کے حصے کی جگہ اب ایک خبروں کا نظام نصب کردیا گیا ہے جس میں ضروری اعلانات کے ساتھ ساتھ مختلف کٹیگریز میں انفارمیشن ٹیکنالوجی کی خبریں بھی دکھائی جاتی ہیں۔ مختلف کٹیگریز میں خبریں اور ان پر تبصرے کا یہ نظام سلیش ڈاٹ سے ملتا جلتا ہے۔ کسی حد تک یہ وہی کام کر رہا ہے جو کہ قدیر احمد رانا کا سیٹ اپ کیا ہوا اردو ٹیکنالوجی اخبار کر رہا ہے۔ ہم اردو ویب پر ایک باقاعدہ سائنس اور ٹیکنالوجی جریدہ شروع کرنے والے ہیں جس کی تفصیل ذیل میں ہے۔

اردو جریدہ

اردو ویب پر عنقریب ایک آن لائن جریدہ کا اجراء کیا جائے گا۔ اس کی ادارت بوریت آن لائن کے بانی شارق مستقیم سنبھالیں گے۔ ابتدا میں اس جریدہ میں انفارمیشن ٹیکنالوجی سے متعلقہ مضامین اور خبریں پیش کی جائیں گی۔ بعد میں دوسرے موضوعات جیسے اردو ادب یا سیاست وغیرہ کے لیے بھی سیکشن سیٹ اپ کیے جا سکتے ہیں۔ جو خواتین و حضرات صحافت کا تجربہ رکھتے ہوں اور ہماری رہنمائی کرنا چاہیں تو برائے مہربانی ہم سے رابطہ کریں۔ اس کے علاوہ جو صاحب بھی اس جرید ہ پر نامہ نگاری کرنا چاہیں وہ یہاں پر یا اردو محفل فورم پر رابطہ کر سکتے ہیں۔ اس جریدہ کے مواد کو مربوط کرنے کےلئے جملہ کونٹینٹ منیجمنٹ کا استعمال کیا جائے گا۔