اردوویب بلاگ

السلام علیکم،
میں نے کافی عرصہ قبل وزی وگ ایڈیٹرز ٹائنی ایم سی ای اور ایف سی کے ایڈیٹر میں اردو لکھنے کی سپورٹ‌ شامل کی تھی۔ اب ان وزی وگ ایڈیٹرز کے نئے اور بہتر ورژن آ چکے ہیں۔ اسی لیے میں اب ان دونوں ایڈیٹرز کی اردو سپورٹ کے ساتھ اپڈیٹ فراہم کر رہا ہوں۔ اس مرتبہ میں نے اردو کی میپ کو دونوں وزی وگ ایڈیٹرز میں بطور پلگ ان انٹگریٹ کیا ہے۔ اس طرح ان وزی وگ ایڈیٹرز کو آئندہ کے لیے اپڈیٹ کرنا آسان ہو جائے گا۔

ٹائنی ایم سی ای اور ایف سی کے ایڈیٹر دونوں ہی مقبول ترین وزی وگ ایڈیٹرز ہیں اور اکثر کونٹینٹ منیجمنٹ سسٹمز میں مواد کی تدوین کے لیے انہیں استعمال کیا جاتا ہے۔ مثال کے طور پر ورڈپریس اور جملہ میں ٹائنی ایم سی ایڈیٹر بائی ڈیفالٹ انسٹال ہوتا ہے اور ان دونوں سوفٹویر کے لیے ایف سی کے ایڈیٹر کا پلگ ان بھی دستیاب ہے۔ نوٹ کریں کہ یہاں پیش گئے وزی وگ ایڈیٹرز عام استعمال کے لیے فراہم کیے جا رہے ہیں اور کسی خاص‌ سکرپٹ یا کونٹینٹ منیجمنٹ سسٹم کی انٹگریشن خاص طور پر فراہم نہیں کی جا رہی ہے۔ البتہ میں جلد ہی مختلف سوفٹویر میں وزی وگ اردو ایڈیٹرز کے استعمال کے بارے میں معلومات فراہم کروں گا۔ ذیل کے سکرین شاٹس میں وزی وگ ایڈیٹرز میں نوری نستعلیق کا استعمال دکھایا گیا ہے۔

اردو ایف سی کے ایڈیٹر کا ڈیمو ملاحظہ کریں
اردو ایف سی کے ایڈیٹر ڈاؤنلوڈ کریں
ایف سی کے ایڈیٹر کی ڈاکومنٹیشن

اردو ٹائنی ایم سی ایڈیٹر کے ڈیمو ذیل کے روابط پر ملاحظہ کیے جا سکتے ہیں:

سادہ ڈیمو
مکمل فیچرز کا ڈیمو
ورڈ انٹرفیس
ٹائنی ایم سی ایڈیٹر کی مختلف سکنز

اردو ٹائنی ایم سی ایڈیٹر ڈاؤنلوڈ کریں
ٹائنی ایم سی ایڈیٹر کی ڈاکومنٹیشن

اردو وزی وگ ایڈیٹرز کے بارے میں سوال و جواب کے لیے محفل فورم کے اس موضوع پر تشریف لائیں۔

آپ لوگوں نے محسوس کیا ہو گا کہ اردو محفل میں چند دنوں سے ایرر آ رہے ہیں اور یہ کچھ وقت مشکل سے کھلتی ہے۔ مگر یہ مسئلہ صرف محفل کے ساتھ ہی نہیں بلکہ اردوویب کے تمام ڈائنامک پیجز کے ساتھ ہے جیسے اردوویب بلاگ، وکی، وغیرہ۔

ہوا یوں کہ اردوویب اب شیئرڈ ہوسٹنگ کے لئے بڑی ہو گئ ہے۔ اس لئے ہم نے سوچا کہ وی‌پی‌ایس ہوسٹنگ لے لی جائے۔ ایک ہفتہ پہلے ہم نے اپنے موجودہ ہوسٹ ہی سے وی‌پی‌ایس ہوسٹنگ لی۔ بہتر ہوسٹنگ کا خمیازہ ہمیں پچھلے کچھ دن سے بھگتنا پڑ رہا ہے۔

اس کی پہلی وجہ کچھ ہوسٹنگ کمپنی کی طرف گڑبڑ تھی کہ وہ ہمیں طے‌شدہ میموری سارا وقت نہیں دے رہے تھے اور ہماری میموری الاٹمنٹ میں گڑبڑ ہو رہی تھی۔ وہ مسئلہ امید ہے کہ اب ختم ہو گیا ہے۔

مگر ابھی بھی مسائل باقی ہیں۔ اصل میں جب پاکستان میں دن ہوتا ہے تو ہمارے سرور پر لوڈ بہت بڑھ جاتا ہے اور کل میموری ہماری طے‌شدہ برسٹ میموری سے بھی آگے نکل جاتی ہے۔ ہم چیک کر رہے ہیں کہ کون کون سے سکرپٹ زیادہ میموری کھاتے ہیں اور ان میں سے کون کون سے ضروری ہیں اور کن کو غائب کیا جا سکتا ہے تاکہ میموری کی ضروریات کو ایک حد کے اندر رکھا جا سکے۔

اسی وجہ سے محفل کے کچھ فیچرز بھی فی الحال ختم کئے گئے ہیں۔

اسی سلسلے کی ایک کڑی یہ ہے کہ اس ہفتے روزانہ شاید کوئ ایک چیز جیسے بلاگ یا اردو لائبریری وکی سائٹ وغیرہ 24 گھنٹے کے لئے بند کی جائے گی۔ اس بارے میں میں اسی تھریڈ میں اعلان کروں گا کہ کونسی چیز کب سے کب تک بند ہو گی۔ اس کا مقصد یہ ہے کہ ہر ایک کی میموری کی ضروریات کا تخمینہ لگایا جا سکے۔

پیر یعنی سوموار مارچ 9 کو میرے صبح کے 11 بجے (utc-5) یعنی پاکستان کے رات کے 8 بجے محفل کو 24 گھنٹوں کے لئے بند کیا جا رہا ہے۔

منگل 10 مارچ کو پاکستان کے رات کے 8 بجے اردو سیارہ کو 24 گھنٹوں کے لئے ڈاون کیا جائے گا۔

بدھ 11 مارچ کو پاکستان کے رات کے 8 بجے اس بلاگ کو 24 گھنٹوں کے لئے ڈاون کیا جائے گا۔

جہانزیب نے کچھ دن پہلے لکھا تھا کہ:

آج اردو سیارہ پر عالمی اخبار کی تحریر دیکھی ۔ پتہ نہیں جنگ، بی بی سی، اردو پوائنٹ بلاگرز کو سیارہ پر جگہ نہیں ملی، عالمی اخبار کے بلاگرز کو خصوصی رعائت؟

تو اس کا سیدھا سا جواب یہ ہے کہ کوئ خصوصی رعایت نہیں۔ عالمی اخبار نے اپنے بلاگ کے لئے سیارہ پر شمولیت کی درخواست دی تھی۔ سو ہم نے شامل کر دیا۔ اگر بی‌بی‌سی یا اخبارات کے بلاگ شامل ہونا چاہتے ہیں اور شمولیت فارم پر کرتے ہیں تو ہمیں کوئ اعتراض نہیں۔

ہماری رائے میں تمام تحریری اردو بلاگ جو اخلاق سے گرے نہ ہوں اور سپیم قسم کے بلاگ نہ ہوں اور سیارہ کے قواعد و ضوابط کے پابند ہوں انہیں شامل کیا جائے۔

اگر ایسے کمرشل ادارے کے بلاگ سیارہ پر چھا جاتے ہیں کہ ان کی پوسٹس بہت زیادہ ہوتی ہیں تو پھر کوئ لمٹ لگائ جا سکتی ہے کہ ان کی ایک وقت میں کچھ خاص تعداد سے زیادہ تحریریں سیارہ پر نظر نہ آئیں۔

آپ لوگوں کا کیا خیال ہے؟

AssalamOAlaikum,
In this post I am presenting a new Urdu editor plugin for WordPress. This Urdu editor better and more extensive Urdu editor integration with different parts of WordPress, both inside the admin section as well as on the front-end blog. It is also possible to customize different aspects of the Urdu editor by changing its settings. This plugin is based on the jQuery javascript framework and this has been written as part of the plan to update UrduPress to version 2.7 of WordPress.

Download Urdu editor plugin for WordPress

السلام علیکم،
جیسا کہ میں پہلے بھی عرض کر چکا ہوں کہ ہم ورڈپریس کے اردو ورژن اردو پریس کو ورڈپریس کے ورژن 2.7 پر اپڈیٹ کرنے کے لیے کام کر رہے ہیں۔ جے کویری جاوا سکرپٹ فریم ورک کے لیے اردو ایڈیٹر پلگ ان بھی اسی مقصد کے لیے ڈیویلپ کیا گیا ہے تاکہ ورڈپریس کے لیے ایک بہتر اردو ایڈیٹر پلگ ان تیار کیا جا سکے۔ میں اس پوسٹ میں ورڈپریس کا نیا اردو ایڈیٹر پلگ ان متعارف کروا رہا ہوں جو کہ جے کویری فریم ورک کا استعمال کرتا ہے اور اس کے اردو ایڈیٹر پلگ ان پر مبنی ہے۔ ورڈ پریس کے پرانے اردو ایڈیٹر پلگ ان کے مقابلے میں یہ پلگ ان ورڈپریس کے ایڈمن سیکشن کے زیادہ تر ایڈٹ ایریاز کا احاطہ کرتا ہے۔ اس اردو ایڈیٹر پلگ ان کی ایک اور خاص بات یہ ہے کہ یہ ورڈ پریس کے ایڈمن سیکشن کے دوسرے فنکشنز جیسے کہ آٹو سیو وغیرہ کی راہ میں رکاوٹ نہیں بنتا اور دوسری سکرپٹس کے ساتھ بخوبی کام کرتا ہے۔ واضح رہے کہ اس ایڈیٹر کو ورڈپریس 2.7 پر ہی ٹیسٹ کیا گیا ہے، اور اس کا استعمال انٹرنیٹ ایکسپلورر اور فائرفاکس پر جانچا گیا ہے۔ فی الحال اسے بطور بیٹا ریلیز کیا جا رہا ہے۔ علاوہ ازیں نیا اردو ایڈیٹر پلگ ان استعمال کرنے سے قبل پرانا اردو ایڈیٹر پلگ ان ان انسٹال کرنا بہتر رہے گا۔

زیر نظر اردو ایڈیٹر پلگ ان کے ذریعے ورڈپریس کے جن حصوں میں اردو ایڈیٹر انٹگریشن دستیاب ہوجاتی ہے ان کی فہرست ذیل میں دی گئی ہے۔

فرنٹ اینڈ (بلاگ)
۔ سرچ ٹیکسٹ باکس
۔ تبصروں کے لیے ایڈیٹر

ایڈمن سیکشن
۔ کوئک پریس
۔ نئی پوسٹ شامل کرنے والا صفحہ
۔ نیا پیج شامل کرنے والا صفحہ – زمرہ جات شامل کرنے والا صفحہ – روابط شامل کرنے والا صفحہ
۔ تبصروں کو فوری ایڈٹ کرنا
۔ ٹیگز شامل کرنا

ورچوئل کی بورڈ

ورڈپریس کے نئے اردو ایڈیٹر پلگ ان میں ورچوئل کی بورڈ بھی دستیاب ہے لیکن یہ انٹرنیٹ ایکسپلورر میں درست کام نہیں کر رہا ہے جبکہ یہ فائرفاکس میں یہ درست کام کرتا نظر آ رہا ہے جیسا کہ ذیل کی تصویر میں دکھایا گیا ہے۔

آن سکرین کی بورڈ

آن سکرین کی بورڈ صرف بلاگ کے تبصروں کے ایڈیٹر کے لیے دستیاب ہے اور ایڈمن سیکشن میں کچھ مسائل کی وجہ سے آن سکرین کی بورڈ فراہم نہیں کیا گیا ہے۔

اردو ایڈیٹر پلگ ان آپشنز

ورڈپریس کے نئے اردو ایڈیٹر پلگ ان میں فرنٹ اینڈ بلاگ اور ایڈمن سیکشن کے ہر حصے میں اردو ایڈیٹر کی انٹگریشن کو فعال یا غیر فعال کرنے کی آپشنز مہیا کی گئی ہیں۔ ورچوئل کی بورڈ کو بھی فعال یا غیر فعال کیا جا سکتا ہے۔ لیکن غالباً سب سے اہم آپشنز خود اردو ایڈیٹر کو کسٹمائز کرنے کی ہیں۔ جیسا کہ ذیل کی تصویر میں دکھایا گیا ہے، اردو ایڈیٹر میں استعمال کیے جانے والے فونٹ کو تبدیل کیا جا سکتا ہے۔

اس کے علاوہ اردو ایڈیٹر کے اردو لینگویج موڈ اور انگریزی لینگویج موڈ کو بھی اس پلگ ان کی سیٹنگز میں تبدیل کیا جا سکتا ہے جیسا کہ ذیل کی تصویر میں دکھایا گیا ہے۔

ورڈپریس کے اس نئے اردو ایڈیٹر پلگ ان کے بارے میں آپ کی آراء کے ہم منتظر رہیں گے۔

ورڈ پریس کا اردو ایڈیٹر پلگ ان ڈاؤنلوڈ کریں

AssalamOAlaikum,

In this post I am presenting an Urdu Editor plugin for the jQuery javascript framework. This plugin offers the same functionality as the Urdu WebPad javascript component with some additional features. Combined with the powerful jQuery framework, this plugin offers much better possibilities of intergating the Urdu editor in web applications. JQuery is one of the most popular javascript frameworks these days which is widely used for developing modern web 2.0 applications. I therefore urge everybody developing Urdu web applications and those who are customizing blog themes for Urdu blogs to start using the Urdu editor plugin for jQuery because that is where the future belongs. I will also write Urdu editor plugins for other javascript frameworks Prototype and MooTools whenever I find time.

The main motivation for developing the Urdu editor plugin for jQuery was to create an Urdu editor plugin for WordPress 2.7. We are working to update UrduPress, the Urdu version of WordPress, to version 2.7 of WordPress, and creating a new Urdu editor plugin is the first step in this direction. The existing Urdu editor plugin integrates in only a few edit areas and some features of WordPress admin section section such as autosave stop working when this plugin is active. I hope that using jQuery Urdu editor plugin will solve such interoprability problems.

Download Urdu Editor Plugin for the jQuery JavaScript Framework

السلام علیکم،
ورڈپریس 2.7 کے اجرا کے بعد جب ہم نے اردو پریس 2.7 کی تیاری کا ارادہ کیا تو میں نے ذکر کیا تھا کہ سب سے پہلے میں جے کویری (jQuery) جاوا سکرپٹ فریم ورک کے لیے اردو ایڈیٹر پلگ ان تیار کروں گا اور اسی کو اردو پریس کے اگلے ورژن کے لیے استعمال کیا جائے گا۔ میں نے جے کویری کے لیے اردو ایڈیٹر پلگ ان کے ابتدائی ورژن پر کام مکمل کر لیا ہے اور اسے یہاں پیش کر رہا ہوں۔ ورڈپریس کے لیے اردو ایڈیٹر پلگ ان کا اگلا ورژن بھی جے کویری کے اسی پلگ ان پر مبنی ہوگا اور اسے بھی جلد ریلیز کر دیا جائے گا۔

جے کویری ایک مقبول ترین اور پاورفل فیچرز والا جاوا سکرپٹ فریم ورک ہے۔ جے کویری کے لیے اردو ایڈیٹر پلگ ان کی ڈیویلپمنٹ کو میں ایک اہم پیشرفت سمجھتا ہوں کیونکہ اس طرح اردو ایڈیٹر کو ایک اچھے جاوا سکرپٹ فریم ورک کی سپورٹ میسر آ گئی ہے۔ اس کے ذریعے اردو ایڈیٹر کو ویب ایپلیکیشنز میں بہت مؤثر انداز میں استعمال کرنا ممکن ہو جائے گا۔

جے کویری کی ایک خاصیت یہ ہے کہ اس کے ذریعے ویب صفحات میں non-intrusive یعنی غیر محسوس انداز تبدیلی کی جا سکتی ہے۔ اس سے مراد یہ ہے کہ ویب پیج میں تمام تر جاوا سکرپٹ کوڈ کو صرف head ٹیگ میں شامل کرنے کی ضرورت پیش آتی ہے اور اس کے لیے ویب پیج کی ایچ ٹی ایم ایل میں جابجا تبدیلیاں نہیں کرنی پڑتی ہیں۔ اگرچہ ڈاؤنلوڈ میں شامل مثالوں میں لینگویج موڈ سوئچ کرنے کےلیے کنٹرولز اور آن سکرین کی بورڈ کے استعمال کرتے وقت ایچ ٹی ایم ایل میں تبدیلیاں کی گئی ہیں لیکن اسے اگلی اپڈیٹ میں ٹھیک کر دیا جائے گا۔ جے کویری فریم ورک کی سپورٹ کی بدولت ایڈٹ ایریاز کو مختلف انداز میں سلیکٹرز کے ذریعے منتخب کیا جا سکتا ہے جیسا کہ یہاں بیان کیا گیا ہے۔

جے کویری کے اردو ایڈیٹر پلگ کے استعمال کا طریقہ تفصیل سے اس کی ڈاؤنلوڈ میں docs/using_jquery_urdueditor_plugin.html میں موجود ہے۔ اسے یہاں بھی دیکھا جا سکتا ہے۔ میں اسی انفارمیشن کو علیحدہ سے اردو میں بھی پیش کرنے کا ارادہ رکھتا ہوں۔ اس یوزرز گائیڈ میں کوڈ کی سنٹیکس ہائی لائٹنگ کے لیے میں نے گوگل سنٹیکس ہائی لائٹر استعمال کیا ہے۔

جے کویری کے اردو ایڈیٹر پلگ ان کو انٹرنیٹ ایکسپلورر اور فائرفاکس پر ٹیسٹ کیا گیا ہے۔ اس میں بھی لینگویج موڈ سوئچ کرنے کے لیے CTRl+SPACE کی بورڈ شارٹ کٹ کام کرتا ہے۔ اس پلگ ان کی خاص بات یہ ہے کہ اس میں استعمال کیے جانے فونٹ اور اس کے بیک گراؤنڈ کلر کو کسٹمائز کیا جا سکتا ہے۔ اس کا طریقہ بھی اس کی ڈاکومنٹیشن میں بیان کیا گیا ہے۔ ذیل کی تصویر میں ایسی ہی ایک کسٹمائزیشن کی مثال دکھائی گئی ہے جس میں اردو لینگویج موڈ کا بیک گراؤنڈ اس کے ڈیفالٹ سبز رنگ سے مختلف ہے اور اس میں اردو نسخ ایشیا ٹائپ فونٹ کی جگہ علوی نستعلیق فونٹ استعمال ہو رہا ہے۔

اردو ایڈیٹر پلگ ان کو کسٹمائز کرنے کا طریقہ یہاں دیکھا جا سکتا ہے جبکہ اس کی مثال اس ربط پر موجود ہے۔

میں نے جے کویری کے اردو ایڈیٹر پلگ ان کے ساتھ ایک ورچوئل کی بورڈ سکرپٹ بھی شامل کر دی ہے۔ یہ سکرپٹ یہاں سے حاصل کی گئی ہے اور اسے اردو کے لیے کسٹمائز کیا گیا ہے۔ ورچوئل کی بورڈ فائرفاکس میں درست کام کرتا ہے جبکہ انٹرنیٹ ایکسپلورر میں یہ کبھی کبھار پرابلم دیتا ہے۔ ذیل کے تصویر میں ورچوئل کی بورڈ کا استعمال دکھایا گیا ہے:

ورچوئل کی بورڈ کے استعمال کا طریقہ یہاں دیکھا جا سکتا ہے جبکہ اس کی مثال اس ربط پر ملاحظہ کی جا سکتی ہے۔

جے کویری کا ایک اور مفید پلگ ان ٹیکسٹ ایریاز کو ری سائز کرنے کا بھی ہے۔ ٹیکسٹ ایریا ری سائزنگ کا پلگ ان بھی اردو ایڈیٹر پلگ ان کے ساتھ استعمال کیا جا سکتا ہے جیسا کہ ذیل کی تصویر میں دکھایا گیا ہے:

ٹیکسٹ ایریا ری سائزنگ کے استعمال کے بارے میں تفصیل اس ربط پر موجود ہے اور اس کی مثال اس ربط پر ملاحظہ کی جا سکتی ہے۔

میں امید کرتا ہوں کہ جے کویری کا اردو ایڈیٹر پلگ ان اردو میں ویب اپپلیکیشنز کی ڈیویلپمنٹ میں اہم پیشرفت ثابت ہوگا۔ میں اس سلسلے میں آپ کی آراء اور تجاویز کا منتظر رہوں گا۔

جے کویری کا اردو ایڈیٹر پلگ ان ڈاؤنلوڈ کریں

کچھ شکایات موصول ہوئ ہیں کہ بلاگرز نے اردو سیارہ میں شمولیت کی درخواست دی تھی اور بلاگ شامل نہ کیا گیا۔ اس کی وجہ یہ تھی کہ ان کا شمولیت فارم ہمیں ملا ہی نہ تھا۔

چیک کرنے پر معلوم ہوا ہے کہ نومبر یا دسمبر کے مہینے میں کسی وقت وہ بلاگر جنہوں نے اپنا نام شمولیت فارم میں اردو میں لکھا ان کے فارم موصول ہونا بند ہو گئے۔ چونکہ کچھ فارم موصول ہو رہے تھے اس لئے بروقت مسئلے کا علم نہ ہو سکا۔

بہرحال اب میں نے اس مسئلے کو حل کر لیا ہے اور آپ کی شمولیت کی درخواست گم نہیں ہونی چاہیئے۔

یاد رہے کہ عام طور سے بلاگ شامل کرنے کا فارم موصول ہونے کے ایک ہفتے میں اسے سیارہ میں شامل کر دیا جاتا ہے۔ لہذا اگر آپ کو سیارہ میں شمولیت کا فارم پر کئے دو ہفتے ہو چکے ہوں اور آپ کا بلاگ شامل نہ کیا گیا ہو تو پلیز مجھ سے رابطہ کریں۔

السلام علیکم،

اردو محفل فورم پر عنقریب روبی آن ریلز کا ایک کورس شروع کیا جائے گا۔ یہ کورس سعود عالم (ابن سعید) آفر کر رہے ہیں۔ اس کورس کی خاص بات یہ ہے کہ یہ اردو زبان میں ہوگا اور غالبا اسی اعتبار سے منفرد بھی ہوگا۔ روبی آن ریلز حالیہ دور کا ویب اپلیکیشنز ڈیویلپمنٹ کا مقبول ترین فریم ورک ہے جو کہ روبی پروگرامنگ لینگویج پر مبنی ہے۔ اس کورس میں شمولیت کے لیے اس ربط سے رجوع کریں۔

ذیل میں اس کورس کی ابتدائی آؤٹ لائن فراہم کی جا رہی ہے:

0- پری کورس: ڈاؤن لوڈ، تنصیب اور اسی قسم کے دوسرے روابط کی فراہمی
1- ریلس پروجیکٹ سیٹ اپ اور ڈائریکٹری اسٹرکچر کا تعارف
2- سکیفولڈنگ scaffolding کا جادو اور پروجیکٹ پروٹوٹائپنگ
3- ایم وی سی (ماڈل، ویو، کنٹرولر) نظام کا تعارف اور ڈرائی (ڈؤنٹ رپیٹ یورسیلف)
4- ایکٹیو ریکارڈ کا تعارف
5- ریسٹ فل ریلس
6- ریسٹ فل ریلس اور نیسٹیڈ‌ رسورس
7- جیمس اور پلگ انس
8- یونٹ ٹیسٹنگ
9- فائنل پروجیکٹ (2 ہفتے)
10- مجموعی گریڈنگ اور تقسیم اسناد

اس کورس میں بلا معاوضہ ہواجا سکتا ہے لیکن اس کورس کو کامیابی سے مکمل کرنے کی شرط اس میں باقاعدگی سے شرکت اور وقت پر اسائنمنٹس کا مکمل کرنا ہے۔ اس کورس کا انعقاد کرنے والے سعود عالم ایک پروفیشنل سوفٹویر ڈیویلوپر ہیں جن کی اردو کمپیوٹنگ اور اوپن سورس سوفٹویر کے میدان میں گراں قدر خدمات ہیں۔ یہ کورس موجودہ دور کے ایک مقبول عام ویب اپلیکیشن ڈیویلپمنٹ فریم ورک سیکھنے کا ایک سنہری موقع ہے۔ نوٹ کریں کہ اس کورس میں شرکاء کی تعداد محدود ہے، اس لیے اس میں شرکت یقینی بنانے کے لیے جلد از جلد سعود عالم سے رابطہ کریں۔ اس کورس سے متعلق مزید معلومات اردو محفل فورم پر فراہم کی جائیں گی۔

والسلام

السلام علیکم،
دو روز علوی امجد نے علوی نستعلیق فونٹ میں چند خامیوں کو دور کرکے اس کا نیا ورژن ریلیز کیا ہے۔ یہ خامیاں زیادہ تر حروف کے جڑاؤ میں غلطیوں سے متعلق تھیں۔ علوی نستعلیق کے نئے ورژن کو اس ربط سے ڈاؤنلوڈ کیا جا سکتا ہے۔یہ ربط آپ کو اس صفحے پر لے جائے گا جہاں سے آپ فونٹ کے استعمال کی شرائط سے متفق ہونےکے بعد اسے ڈاؤنلوڈ کر سکیں گے۔

نوٹ کریں کہ اس مرتبہ علوی نستعلیق فونٹ‌ کے نام کے ساتھ ورژن نمبر شامل نہیں ہے۔ جو دوست نئے فونٹ کے لیے اپنی ویب سائٹ کی سٹائل شیٹ میں ترمیم کریں، انہیں چاہیے کہ وہ پرانے نام کو بطور بیک اپ فونٹ کے باقی رکھیں تاکہ ویب پیج ان سسٹمز پر بھی درست ڈسپلے ہو جہاں ابھی تک پرانا فونٹ موجود ہے۔

علوی نستعلیق فونٹ ڈاؤنلوڈ کریں

Alvi Nastaleeq, Dawning of a new era in Urdu Computing

اردو کمیونٹی کا ایک دیرینہ خواب ایک ایسا نستعلیق فونٹ رہا ہے جو نوری نستعلیق جیسی خوبصورتی کا حامل ہو۔ بالآخر علوی نستعلیق فونٹ کے اجراء سے اردو کمیونٹی کا یہ خواب شرمندہ تعبیر ہو گیا ہے۔ اس فونٹ کے خالق امجد حسین علوی نے یہ فونٹ تخلیق کرکے اور اسے عوام الناس کے فائدے کے لیے بلامعاوضہ فراہم کرکے بلاشبہ ایک عظیم کارنامہ سرانجام دیا ہے۔ علوی نستعلیق فونٹ کے اجراء کے اردو کمپیوٹنگ پر مرتب ہونے والے اثرات کا ادراک کرنے کے لیے ہمیں ایک مدت درکار ہوگی۔ اگرچہ اپنی ابتدائی ریلیز میں علوی نستعلیق فونٹ بنیادی طور پر ڈیسک ٹاپ اپلیکیشنز میں استعمال کے لیے ہے لیکن اس کے باوجود ویب پر اس کی پرفارمنس بہت شاندار ہے اور اس کا ڈسپلے بھی بہت اچھا لگ رہا ہے۔ ذیل میں ایک علوی نستعلیق فونٹ کے محفل فورم میں استعمال کا ایک سکرین شاٹ موجود ہے:

محفل فورم میں علوی نستعلیق پر مبنی ایک علیحدہ سٹائل بھی متعارف کروا دیا گیا ہے۔ اس سٹائل میں شامل اردو ایڈیٹر میں بھی علوی نستعلیق فونٹ استعمال کیا گیا ہے۔ ذیل میں اس اوپن پیڈ میں علوی نستعلیق کے استعمال کے ساتھ ایک سکرین شاٹ موجود ہے:

علوی نستعلیق فونٹ ڈاؤنلوڈ کریں

علوی نستعلیق کے اجراء سے اردو کمپیوٹنگ کو ایک نئی جہت ملے گی اور کئی نئے پراجیکٹس کی راہ ہموار ہوگی۔ اس فونٹ کے خالق امجد حسین علوی کی اس سلسلے میں تفصیلی پوسٹ اس ربط پر موجود ہے۔ ذیل میں میں اس کا اقتباس پیش کر رہا ہوں۔

کاروانِ عہد

“طلوع اردو”

فاروق سرور خان
23 مارچ 1988
یونیورسٹی آف سنسناٹی میں 1981 کے پہلے کوارٹر کے دوران میں نے انٹر ایکٹیو کمپیوٹر گرافکس کے آخری ٹیسٹ کے لئے ڈاکٹر برگس نے کلاس کو اپنی پسند سے کسی بھی ممکنہ تصویر، آؤٹ لائین ، سکائی لائین یا کسی بھی قسم کے شیپ کو فارمولوں اور پروگرامز کی مدد سے کمپیوٹر، گرافکس ٹرمینل اور پلاٹر کی مدد سے ڈرائنگ کرنے کے لیئے کہا۔ پلاٹر پر پلاٹ کرنا تو شاید ایک آسان کام ہوتا، لیکن اس سے بھی مشکل کام یہ تھا کہ کیا بنایا جائے۔ مجھے خیال آیا کہ اردو کے حروف تہجی الف سے یے تک لکھتا ہوں۔ ان کو کروی لینئیر فارمولوں میں بیزئیر قوسوں کی مدد سے بناتا ہوں، بچپن کا تختی لکھنا کام آیا، پہلے حروف ہاتھ سے لکھے اور پھر ان کو قوسوں اور لکیروں کی شکل دی، بیزئیر اوزان لگائے اور چند دنوں میں صرف آؤٹ‌لائین والے اور بھرے ہوئے دونوں طرح کے کوئی 36 حروف میرے سامنے تھے۔ جو میں نے کسی خواب و خیال کے بغیر اپنے اسائنمنٹ کے لئے جمع کرادئیے۔ کوارٹر کے آخری دن، حسب عادت و دستور، ڈاکٹر برگس نے طالب علموں کے نام لے کر ان کے اسائنمنٹ واپس کرنے شروع کئے۔ میرا نام پکارا مسٹر خان! میں اٹھ کر چلا تو اسی دوران اس نے میرا جمع کیا ہوا کام ساری کلاس کو دکھاتے ہوئے کہا ،—- بہترین کام، میری بیوی کو یہ یورڈو کیریکٹرز بہت پسند آئے۔—-
ستاروں‌ بھری آنکھوں نے بڑا سا A بہت بعد میں دیکھا اور اردو کو جدید ٹیکنالوجی کے آسمان پر طلوع ہوتے ہوئے پہلے دیکھا! یہ اسی وعدہ کی تکمیل کا دن ہے۔ مجھے معلوم ہے کہ وہ دن دور نہیں، جب آپ کے اردو پیغامات الیکترونی مواصلاتی نظام سے گذرتے ہوئے آپ تک پہنچیں گے۔ مجھے یقین ہے کہ آنے والے وقت میں مجھ سے بہتر، ذہین اور محنتی برادران اس کام کو مزید آگے بڑھائیں گے۔

۲ نومبر ۲۰۰۸ء
ہاں!۔۔۔ یہ فاروق سرور خان کے دیکھے ہوئے خواب کی تکمیل کا ایک اور عہد ساز دن ہے۔ شائد اس بار تقدیر کےپرندے کو میرے سر پر متمکن ہونا تھاتاکہ یہ عظیم خدمت میرے ہاتھوں سے انجام پا سکے۔ لیکن ۔۔۔یہ تو اس کارواں کا ایک عارضی پڑاؤ ہے ۔۔۔۔۔آگے ہر قدم ۔۔۔ہر گام پر ۔۔نئی منزلوں ۔۔۔ نئے راستوں پر یہ کارواں اپنی فتوحات کا جھنڈا گاڑتا چلا جائے گا۔ہم ہوں نہ ہوں ہمارے بعد کتنے اور لوگ اس عہد کو نبھانے کا عزم لے کر اس کارواں کے ہم رکاب بنتے رھیں گے اوریوںمرزا جمیل احمد کا چلایاہوا یہ کاروانِ عہد ہر دور میں اپنی منزل کی طرف اسی شان سے رواں دواں رہے گا۔ آج اسی کارواں کے ایک ادنی ٰمسافر کی حیثیت سے میں اسی عزم کوپھر دوہرانے کی سعادت حاصل کروں گا کہ ٹیکنالوجی کا آسمان جتنا بھی بلند کیوں نہ ہوتا جائے ہم اس پر اپنی قومی زبان کے ستارے کو ہمیشہ چمکتا دمکتا اور سب سے روشن دیکھنا چاہیں گے۔ ہمارے ارادے جوان ہیں اور نگاہیں آسمان پر ہیں یہی تو اس قوم کی خاصیت ہے۔

آج کا دن فاروق سرور خان کے نام جن کی وطن سے محبت اور خلوص سے مجھے اور میرے جیسے نمعلوم کتنے اور لوگوں کو ایک جذبہ اور جدوجہد کا ولولہ ملا اوریقیناًملتا رہے گا۔ یوں یہ سلسلہ قائم و دائم ہے ۔

اس فانٹ کی تیاری میں محترم شاکر القادری صاحب کی ہرلمحہ کی حوصلہ افزائی کا بے انتہا شکر گذار ہوں۔ جنہوں نے اپنی قیمتی وقت اور پرخلوص دعاوں سے ہر ممکنہ مشاورت دی۔ اسی طرح القلم فورم کو سالگر ہ کی مبارکباد دینا بھی اپنا فرض سمجھتا ہوں۔ جس پر مجھے بہت زیادہ اپنائیت ملی۔ اتنا خلوص اور محبت تو میرے جیسے کم مایہ انسان کی توقعات کی بلندیوں سے بھی بہت بڑھ کر ہے۔ اللہ آپ ساتھیوں کو کو ترقی و عظمت سے نوازے۔

اور اب شائد آپ شدت سے اس گھڑی کے انتظار میں ہوں گے جب علوی نستعلیق آپ کے ہاتھوں میں ہو تو میرے خیال میں وہ لمحہ اب آگیا ہے میں آپ کے اور علوی نستعلیق کے درمیان مزید حائل نہیں ہونا چاہتا۔ یہ اب آپ کی دسترس میں ہے۔ آپ اس کے سکرین شارٹس سے بخوبی آشنا ہیں۔ اس لئے مزید کسی سکرین شارٹس کی ضرورت نہیں۔ یہ فانٹ اپنے آپ کو خود منوانے کی صلاحیت رکھتا ہے۔

السلام علیکم،

مائی بی بی ایک اوپن سورس فورم سوفٹویر ہے جو کہ اپنی فیچرز میں وی بلیٹن سے مشابہت رکھتا ہے۔ محفل فورم کے ممبر سائلنٹ کلر نے اس کا اردو ترجمہ فراہم کیا جس کے بعد میں نے مائی بی بی کے اردو پیکج کی تیاری کا آغاز کیا۔ اس کام میں مجھے قدرے دشواری کا سامنا کرنا پڑا کیونکہ مائی بی بی میں prototype.js جاوا سکرپٹ لائبریری کا استعمال ہو رہا ہے اور اردو ایڈیٹر (اردو ویب پیڈ) کی موجودگی میں prototype.js درست کام نہیں کرتی۔ اسی لیے میں نے علیحدہ سے اردو ویب پیڈ کا ایک ورژن تیار کیا جو کہ prototype.js سے کمپیٹیبل ہے اور اس طرح مائی بی بی میں اردو ایڈیٹر کی انٹگریشن ممکن ہوئی۔ میں مائی بی بی کا ایک اردو پیکج کا بیٹا ورژن فراہم کر رہا ہوں۔ اگرچہ میں نے اس کےترجمے میں کچھ اصلاح کی کوشش کی ہے لیکن ابھی بھی اس میں بہتری کی بہت گنجائش موجود ہے۔ اردو مائی بی بی پیکج میں اردو گرافکس بھی شامل ہیں۔ میں نے اردو مائی بی بی کی ایک ٹیسٹ انسٹالیشن بھی سیٹ اپ کر دی ہے۔ آپ دوستوں کو دعوت دی جاتی ہے کہ اس کی ٹیسٹنگ کریں اور اس کے استعمال میں پیش آنے والے مسائل سے آگاہ کریں تاکہ اس سوفٹویر میں بہتری لائی جا سکے۔

اردو مائی بی بی کی ڈیمو انسٹالیشن
اردو مائی بی بی پیکج ڈاؤنلوڈ کریں

ذیل میں اردو مائی بی بی کی ٹیسٹ انسٹالیشن کے کچھ سکرین شاٹ پیش کیے جا رہے ہیں: