اردوویب بلاگ

درج ذیل بحث “اردو ویب سائٹس” یا “اردو ویب سائٹ” میں سے کسی ایک کے اردو قواعد کے مطابق ہونے سے متعلق ہے۔ یہ ذہن میں رہے کہ اوپر دیے گئے مرکبات کا ویب سائٹس کے مجموعہ کی طرف اشارہ کرنا مقصود ہے۔ بحث کے آغاز سے آگاہی کیلئے اس صفحہ پر دیئے گئے تبصرہ جات سے رجوع کریں۔

اردو میں جمع کا مفہوم دینے کیلئے فقط اسم میں ہی تبدیلی کافی نہیں بلکہ اس سے پہلے آنے والے حروف جار (کا، کے، کی وغیرہ) بھی تبدیل ہوجاتے ہیں۔ مثلا آپ کی مثال میں “آم کا باغ”واحد ہوگا اور جمع کیلئے “آم کے باغات” (لیکن قواعد کے قریب ترین “آموں کے باغات” ہے۔) استعمال ہوگا۔ اگر کسی وجہ سے باغات نہ بھی استعمال کیا جائے (جس کی وجہ سوائے عوام الناس کے زبان زد عام ہونے کے، میرے لئے ناقابل فہم ہے) تو “آم کے باغ” میں “کے” کی موجودگی جمع کی طرف اشارہ کرتی ہے۔ ہمارے معاملہ میں “کے” نا پید ہے۔ براہ مہربانی اس بات کا نوٹس لیا جائے۔ دوسرا اہم معاملہ ہماری اس خآص مثال میں “اردو ویب سائٹس” کا بیک وقت مرکب اضافی اور توصیفی ہونا ہے۔ “اردو” یہاں بحثیت صفت کے بھی استعمال ہورہی ہے اور مضاف الیہ کے بھی۔ سائٹس موصوف بھی ہے اور
مضاف بھی۔ اردو کے قواعد کی رو سے صفت اور موصوف جنس، تعدار (واحد یا جمع) اور حالت (مرفوع، منصوب وغیرہ) میں ایک دوسرے سے مطابقت رکھیں گے۔ یہ علیحدہ بات ہے کہ اردو میں صفات اکٹر واحد بمنزلہ جمع بھی پائی جاتی ہیں مٹلا عمر رفتہ اور ایام رفتہ میں رفتہ۔ اگرچہ عمر اور ایام تعداد میں مختلف ہیں۔ میری گزارش ہے کہ اگر سائٹس ناگوار گزرتا ہے تو اس کا اردو نعم البدل استعمال کیا جائے ، یا سائٹ کو اردو میں بطور “جمع” بھی داخل کیا جائے، یا قواعد تبدیل کئے جائیں، اور یا اسے استعمال کرلیا جائے۔

یہاں ایک اور بات کرنے کو بھی میرا جی چاہ رہا ہے۔ وہ یہ کہ اگرچہ انگریزی نے دنیا کی تمام زبانوں کو متاثر کیا ہے لیکن ہمارے ہاں لوگ بھی متاثر ہوگئے ہیں۔ میں نے خود ملاحظہ کیا ہے کہ عربی اور فارسی وغیرہ میں اگرچہ عام استعمال میں بہت سے نئے الفاظ آ چکے ہیں لیکن لکھنے میں بہت خالص زبان استعمال کی جاتی ہے۔ اور قواعد سے بالکل بھی انحراف نہیں کیا جاتا۔ ہمارے ہاں لوگ چاہتے ہیں کہ جو بازار میں استعمال ہورہا ہے، قواعد اردو میں بھی وہی لکھ دیا جائے۔ اگر کوئی قواعد اور اصول کی بات کرے تو اسے نکو بنایا جاتا ہے۔ جو سمجھ سے بالاتر نہیں ہے اگر ہم دیکھیں کہ آئین پاکستان (جو سلسلہ روز و شب امور حکومت کے قواعد کا مجموعہ ہی تو ہے!) کے بارے میں ہمارے حکمران کیا نظریہ رکھتے ہیں۔ اللہ مولوی عبدالحق کو غریق رحمت کریں۔ مجھے اندازہ ہے انہیں کیا کچھ نہیں کرنا پڑا ہوگا۔

This entry was posted on Tuesday, February 8th, 2005 at 5:59 am and is filed under Miscellaneous, Urdu. You can follow any responses to this entry through the RSS 2.0 feed. You can skip to the end and leave a response. Pinging is currently not allowed.