اگر آپ اردو سیارہ پر اپنا بلاگ شامل کرنا چاہتے ہیں مگر فارم پر کرتے ہوئے “میں اردو سیارہ کے قوائد و ضوابط کا اقرار کرتا/کرتی ہوں” کے جواب میں “نہیں” لکھتے ہیں تو ظاہر ہے کہ آپ کا بلاگ سیارہ میں شامل نہیں کیا جائے گا۔
جیسا کہ ابن سعید نے کچھ دن پہلے مطلع کیا تھا اب وقت آ گیا ہے کہ اردوویب کو نئے ہوسٹ پر منتقل کیا جائے۔
یہ کام کل یعنی منگل فروری 7 صبح تقریبا 8-10 بجے ایسٹرن سٹینڈرڈ ٹائم (UTC-5) کو کیا جائے گا۔ برطانیہ میں اس وقت دوپہر 1-3 بجے ہوں گے اور پاکستان میں شام 6-8 بجے۔
سب سے پہلے محفل، بلاگ اور سیارہ وغیرہ کو کچھ دیر کے لئے ڈاؤن کیا جائے گا۔ اس دوران آپ منتقلی وغیرہ کے متعلق معلومات اردوویب ٹویٹر اکاؤنٹ سے شاید حاصل کر سکیں۔
نئے ہوسٹ پر منتقلی امید ہے کہ ایک دو گھنٹے میں مکمل ہو جائے گی۔ مگر چونکہ ڈی این ایس بدلتے بدلتے کبھی کبھی ایک دو دن بھی لگ جاتے ہیں اس لئے جیسے ہی نئی سائٹ آن لائن ہو گی ہم اعلان کر دیں گے کہ اردوویب http://www.urduweb.net پر اب آن لائن ہے۔ خیال رہے کہ یہ یو آر ایل عارضی ہے۔ دو گھنٹوں سے لے کر تین دنوں کے اندر http://www.urduweb.org آپ کو نئی سائٹ پر لے جائے گی۔ یہ وقت آپ کی انٹرنیٹ سروس پر منحصر ہے۔
السلام علیکم،
آج میں اردو ایڈیٹر یوزر سکرپٹ متعارف کروانے جا رہا ہوں جس کے ذریعے کسی بھی ویب پیج کے ایڈٹ ایریاز کو اردو ایڈیٹر میں تبدیل کیا جا سکے گا۔ کچھ روز قبل میں نے ایک اردو ایڈیٹر بکمارکلٹ ریلیز کیا تھا جو بالکل اسی مقصد کے لیے استعمال کیا جاتا ہے لیکن فرق یہ ہے کہ اس بکمارکلٹ کا کوڈ ایک بیرونی سائٹ سے لوڈ ہوتا ہے جبکہ یوزر سکرپٹ آپ کے کمپیوٹر میں محفوظ ہوتی ہے۔ اردو ایڈیٹر بکمارکلٹ متعارف کرواتے ہوئے میں نے ذکر کیا تھا کہ یہ بکمارکلٹ فریم کے اندر والے ایڈٹ ایریاز پر کام نہیں کرے گا۔ یہاں یوزر سکرپٹ مفید ثابت ہوتی ہے کیونکہ اسے فریم کے اندر والے ایڈٹ ایریاز میں بھی استعمال کیا جا سکتا ہے۔ اردو ایڈیٹر بکمارکلٹ اور اردو ایڈیٹر یوزر سکرپٹ میں ایک اور فرق یہ بھی ہے کہ اردو ایڈیٹر بکمارکلٹ تقریبا ہر براؤزر میں استعمال کیا جا سکتا ہے لیکن یوزر سکرپٹ صرف انہی براؤزرز میں استعمال کی جا سکتی ہے جن میں یوزر سکرپٹنگ کی سہولت موجود ہے۔
دو مختلف یوزر سکرپٹس
کئی سال قبل میں یوزر سکرپٹنگ کے موضوع پر لکھا تھا اور ایک یوزر سکرپٹ بھی متعارف کروائی تھی جس کے ذریعے گوگل میں براہ راست اردو لکھنا ممکن ہو گیا تھا۔ اب وہ پرانی یوزر سکرپٹ کام نہیں کرتی ہے۔ اس مرتبہ میں جو یوزر سکرپٹس متعارف کروا رہا ہوں انہیں کسی بھی ویب پیج پر استعمال کرنا ممکن ہے۔ میں یہاں دو یوزر سکرپٹس متعارف کروا رہا ہوں۔
1۔ اردو ایڈیٹر یوزر سکرپٹ: اس یوزر سکرپٹ کے ذریعے تقریباً ہر ویب پیج پر کسی بھی ایڈٹ ایریا کو اردو ایڈیٹر میں تبدیل کیا جا سکتا ہے۔ چند استشنیات ہیں جن کا میں بعد میں ذکر کروں گا۔ اردو ایڈیٹر یوزر سکرپٹ سادہ ٹیکسٹ باکس کے ساتھ ساتھ وزی وگ ایڈیٹرز میں بھی کام کرتی ہے
2۔ اردو ایڈیٹرز یوزر سکرپٹ: یہ یوزر سکرپٹ میں نے ایک دوست کی فرمائش پر تیار کی ہے۔ اس یوزر سکرپٹ کو فعال کیا جائے تو کسی بھی ویب پیج کے تمام ایڈٹ ایریاز میں اردو ایڈیٹر انٹگریٹ ہو جاتا ہے۔ اس سے جہاں ایک طرف سہولت ہو جاتی ہے تو ایک دقت بھی پیدا ہو جاتی ہے کہ جن ایڈٹ ایریاز میں انگریزی لکھی جانی چاہیے، یعنی ای میل وغیرہ سے متعلق ٹیکسٹ باکس، وہ بھی اردو ایڈیٹر میں تبدیل ہو جاتے ہیں۔
میرے تجربے کے مطابق کسی ایک ویب پیج پر دونوں یوزر سکرپٹس کا بیک وقت استعمال ٹھیک نہیں رہتا ہے۔ میری دانست میں دوسرے نمبر والی یوز سکرپٹ یعنی اردو ایڈیٹرز یوزر سکرپٹ کو صرف انہی ویب ایڈریسز کے لیے فعال کیا جانا چاہیے جہاں اس کی واقعی افادیت ہو، باقی سائٹس پر پہلے والی یوزر سکرپٹ کا استعمال ٹھیک رہتا ہے۔
میں نے بالا کی دونوں یوزر سکرپٹس کو فیس بک، گوگل اور بلاگر سمیت کئی ویب سائٹس پر استعمال کرکے دیکھا ہے اور ان سب پر یہ صحیح کام کر رہی ہے۔ صرف گوگل پلس کے تبصروں کے خانے میں یہ نہیں چل رہی ہے۔ دلچسپ بات یہ ہے کہ گوگل پلس کے تبصروں کے خانے میں اردو ایڈیٹر بکمارکلٹ صحیح کام دیتا ہے۔
یوزر سکرپٹس کو کونسے براؤزرز میں استعمال کیا جا سکتا ہے؟
میں نے مذکورہ بالا یوزر سکرپٹس کو ونڈوز پر فائرفاکس اور اوپیرا براؤزرز میں ٹیسٹ کیا ہے۔ سفاری براؤزر میں اگرچہ گریز کٹ ایکسٹینشن کے ذریعے یوزر سکرپٹس استعمال کی جا سکتی ہیں لیکن ایسا صرف میکنٹاش او ایس ایکس میں کیا جا سکتا ہے۔ گوگل کروم میں یوزر سکرپٹنگ کی فی الحال کوئی اچھی سپورٹ موجود نہیں ہے اور یہی احوال انٹرنیٹ ایکسپلورر کی بھی ہیں۔ لیکن اگر کوئی دوست یہاں پیش کی گئی یوزر سکرپٹس کو ان براؤزرز میں استعمال کرنے میں کامیاب ہو جاتے ہیں تو ضرور اپنے تجربات کے بارے میں ہمیں بتائیں۔
اردو ایڈیٹر یوزر سکرپٹ کا استعمال
اردو ایڈیٹر یوزر سکرپٹ کے ذریعے کسی ایڈٹ ایریا میں اردو ایڈیٹر فعال کرنے کے لیے اس میں شفٹ کی اور لیفٹ ماؤس کلک کمبینیشن کا استعمال کریں
یوزر سکرپٹس کی کنفگریشن
یہاں پیش کردہ یوزر سکرپٹس میں اردو ایڈیٹرز یوزر سکرپٹ کی کنفگریشن کی ضرورت اس صورت میں پڑتی ہے جب اسے کسی مخصوص سائٹ پر استعمال کرنا مقصود ہو۔ اس کے لیے آپ یوزر سکرپٹ کو ایڈٹ کرکے اس میں ایک رول کا اضافہ کر سکتے ہیں جس سے یہ واضح ہوتا ہے کہ یہ یوزر سکرپٹ کس سائٹ پر چل سکتی ہے۔ اس کے بارے میں مزید تفصیل آپ اس ربط پر پڑھ سکتے ہیں۔ آپ اگر اردو ایڈیٹرز یوزر سکرپٹ کو انسٹال کرتے ہیں تو اس میں صرف ایک رول ڈیفائن ہوا ہوتا ہے جس کا اطلاق بلاگر ڈاٹ کام کے تبصروں کے خانے پر ہوتا ہے۔
فائر فاکس میں یوزر سکرپٹ کی انسٹالیشن
بالا کی یوزر سکرپٹس کو فائرفاکس براؤزر میں استعمال کرنے کے لیے آپ کو پہلے فائرفاکس کی ایکسٹینشن گریز مونکی انسٹال کرنا ہوگی۔ گریز مونکی انسٹال کرنے کے بعد آپ ان یوزر سکرپٹس ڈاٹ آرگ سائٹ پر جا کر ان یوزر سکرپٹس کو انسٹال کر سکتے ہیں۔ ان یوزر سکرپٹس کے روابط ذیل میں ہیں۔
اردو ایڈیٹر یوزر سکرپٹ
اردو ایڈیٹرز یوزر سکرپٹ
اوپر کے کسی ایک ربط جانے کے بعد آپ کو ذیل کی تصویر میں دکھایا گیا Install بٹن نظر آئے گا۔
اس بٹن کو کلک کرکے آپ اس یوزر سکرپٹ کو انسٹال کر سکتے ہیں۔ ایک مرتبہ انسٹالیشن مکمل ہو جائے تو اس کے بعد آپ گریز مونکی کی یوزر سکرپٹس منیجمنٹ میں جا کر ان یوزر سکرپٹس کو فعال/غیر فعال کر سکتے ہیں، انہیں ایڈٹ کر سکتے ہیں یا انہیں ان انسٹال بھی کر سکتے ہیں۔
اوپیرا براؤزر میں یوزر سکرپٹ کا استعمال
اوپیرا میں یوزر سکرپٹس کا استعمال فائرفاکس سے قدرے مختلف ہے۔ اوپیرا میں یوزر سکرپٹس استعمال کرنے کے لیے علیحدہ سے کسی ایکسٹینشن کی ضرورت نہیں پڑتی ہے۔ اوپیرا میں یوزر سکرپٹس کو استعمال کرنے کے پہلے ایک اوپیرا کی سیٹنگز میں جا کر ایک ڈائریکٹری کا انتخاب کرنے کی ضرورت پیش آتی ہے جہاں یوزر سکرپٹس کو رکھا کیا جاتا ہے۔ اس کے لیے اوپیرا میں Settings->Quick Preferences میں جا کر Edit Site Preferences کلک کریں جیسا کہ ذیل کی تصویر میں دکھایا گیا ہے۔
اس کے بعد سیٹنگز ڈائیلاگ میں Scripting ٹیب پر جا کر یوزر سکرپٹس کے لیے ایک فولڈر کا انتخاب کر لیں جیسا کہ ذیل کی تصویر میں دکھایا گیا ہے۔
اس کے بعد آپ اردو ایڈیٹر یوزر سکرپٹس ڈاؤنلوڈ کرکے اس فولڈر میں کاپی کریں اور اوپیرا ویب براؤزر کو ری سٹارٹ کریں۔ اب آپ کسی بھی ویب سائٹ پر ان سکرپٹس کو استعمال کر سکتے ہیں۔
میں امید کرتا ہوں کہ آپ ان یوزر سکرپٹس کو کارآمد پائیں گے۔ اس سلسلے میں آپ اگر کوئی تجاویز یا آراء دینا چاہیں تو یہاں تبصرہ کر سکتے ہیں۔
والسلام
السلام علیکم،
میں اس پوسٹ میں اردو ایڈیٹر بکمارکلٹ متعارف کروا رہا ہوں. اس بکمارکلٹ کے ذریعے کسی بھی ویب پیج کے کسی بھی ٹیکسٹ ایریا کو اردو ایڈیٹر میں بدل سکتے ہیں اور اس میں بآسانی اردو ٹائپ کر سکتے ہیں۔
اردو ایڈیٹر بکمارکلٹ کے استعمال کی ہدایات کے لیے یہاں کلک کریں
اب جبکہ تقریباً ہر آپریٹنگ سسٹم پر اردو کی مکمل سپورٹ موجود ہے اور اردو لینگویج سپورٹ انسٹال کرنا پہلے سے آسان ہو گیا ہے، اسی طرح مختلف سوفٹویر میں اردو لکھنا بھی آسان ہو گیا ہے۔ لیکن اس کے باوجود اکثر یہ صورتحال پیش آتی ہے کہ آپ کسی ایسے کمپیوٹر پر کام کر رہے ہوتے ہیں جہاں اردو لینگویج سپورٹ انسٹال نہیں ہوتی ہے اور اسے فوری طور پر انسٹال کرنا ممکن بھی نہیں ہوتا ہے۔ اردو ایڈیٹر بکمارکلٹ کا استعمال ایسی ہی صورتحال کا حل ہے۔ اردو ایڈیٹر بکمارکلٹ کا آئیڈیا گوگل کے اردو ٹرانسلٹریشن بکمارکلٹ سے لیا گیا ہے اور اس کے استعمال کا طریقہ بھی ویسا ہی ہے۔ اردو ایڈیٹر بکمارکلٹ وزی وگ ایڈیٹرز کے لیے بھی کام کرتا ہے۔ اس طرح آپ اس کے ذریعے براہ راست جی میل اور ہاٹ میل وغیرہ میں اردو ای میل بھیج سکتے ہیں۔ اس ربط پر موجود ڈیمو وڈیو میں دکھایا گیا ہے کہ کس طرح اردو ایڈیٹر بکمارکلٹ کے ذریعے جی میل سے نوری نستعلیق میں ای میل بھیجی جا سکتی ہے۔ میں نے اردو ایڈیٹر بکمارکلٹ سے اردو میں ای میل کرنے کے بارے میں علیحدہ سے تفصیلی پوسٹ کروں گا۔ میں نے اردو ایڈیٹر بکمارکلٹ کو فیس بک، گوگل پلس، ٹوٹر اور دوسری کئی ویب سائٹس پر استعمال کرنے کا کامیابی کے ساتھ تجربہ کیا ہے۔ اس کے علاوہ میں نے اس بکمارکلٹ کے ذریعے گوگل ٹاک کے ویب انٹرفیس اور فیس بک چیٹ پر اردو میں چیٹ کرنے کا تجربہ بھی کیا ہے، جیسا کہ ذیل کی تصاویر میں دکھایا گیا ہے:
دو ورژنز
اردو ایڈیٹر بکمارکلٹ کو دو ورژنز اردو ایڈیٹر+ اور اردو ایڈیٹر لائٹ کی صورت میں فراہم کیا جا رہا ہے۔ اردو ایڈیٹر پلس کو اگر استعمال کیا جائے تو اس میں لینگویج موڈ تبدیل کرنے کے لیے کنٹرول فراہم کیے جاتے ہیں اور اس کے ساتھ ہی آن سکرین کی بورڈ بھی دستیاب ہوتا ہے، جبکہ اردو ایڈیٹر لائٹ میں یہ اضافی کنٹرول شامل نہیں ہوتے۔ اسی لیے اردو ایڈیٹر لائٹ لوڈ ہونے میں قدرے تیز ہے۔
اردو ایڈیٹر بکمارکلٹ کے ذریعے جی میل سے نوری نستعلیق خط میں ای میل کرنا
جی میل اور دوسری ویب میل سروسز میں آج کل ای میل لکھنے کے لیے وزی وگ ایڈیٹر کی سہولت عام ہے۔ ان میں نوری نستعلیق فونٹ کے ذریعے ای میل بھیجنے کا طریقہ یہ ہے کہ پہلے ای میل کے متن کو مائیکروسوفٹ ورڈ یا کسی اور ورڈ پروسیسر میں لکھا جائے جہاں اس کے متن پر جمیل نوری نستعلیق اپلائی کیا جاتا اور اس کی سمت دائیں سے بائیں سیٹ کی جاتی ہے جیسا کہ ذیل کی تصویر میں دکھایا گیا ہے۔
اس کے بعد اس متن کو کاپی کرکے جی میل میں پیسٹ کیا جائے تو اس کی فارمیٹنگ اور سمت برقرار رہتی ہے۔ اس کے بارے میں مزید تفصیل اس ربط پر دیکھی جا سکتی ہے۔ اب اردو ایڈیٹر بکمارکلٹ کی دستیابی کے بعد جی میل میں براہ راست اردو میں ای میل لکھنے کا زیادہ آسان طریقہ موجود ہے۔ جی میل میں ایک فیچر پہلے سے تیار کردہ مراسلات (canned responses) کی ہے۔ canned responses جی میل کی ایک تجرباتی فیچر ہے جسے اس کی سیٹنگز میں جا کر Labs ٹیب پر جا کر فعال کیا جا سکتا ہے جیسا کہ ذیل کی تصاویر میں دکھایا گیا ہے۔
اس کے استعمال کا طریقہ یہ ہے پہلے سے ایک مختصر متن کو درست فارمیٹنگ اور دائیں سے بائیں سمت کے ساتھ بطور ایک تیار شدہ مراسلے کے جی میل میں محفوظ کر لیا جائے۔ اس کے بعد جب بھی اردو میں ای میل لکھنا مقصود ہو تو canned responses میں جا کر کسی بھی پہلے سے تیار کردہ متن کو منتخب کریں اور اس کے بعد اردو ایڈیٹر بکمارکلٹ پر کلک کرکے اردو ایڈیٹر کو انیبل کریں۔ اب آپ براہ راست جی میل میں نوری نستعلیق فونٹ میں ای میل لکھ سکتے ہیں۔ یہی تکنیک ان دوسرے ان ویب میل سروسز میں استعمال کرنا ممکن ہے۔
اردو ایڈیٹر بکمارکلٹ اور بلاگر ڈاٹ کام کے بلاگز
ویب پر اردو ایڈیٹر کی ضرورت اکثر مختلف اردو بلاگز پر تبصرے کے لیے پڑتی ہے۔ کچھ بلاگز میں تو اردو ایڈیٹر فراہم کیا جاتا ہے، لیکن ورڈ پریس ڈاٹ کام اور بلاگر ڈاٹ کام کے بلاگز میں یہ سہولت موجود نہیں ہوتی ہے۔ اردو ایڈیٹر بکمارکلٹ ورڈ پریس ڈاٹ کام کے کمنٹ باکس میں درست کام کرتا ہے لیکن یہ بکمارکلٹ بلاگر ڈاٹ کے تبصروں کے خانے میں کام نہیں کرتا ہے۔ اس کی وجہ یہ ہے کہ بلاگر کے بلاگز پر تبصروں کا خانہ ایک فریم میں ہوتا ہے اور یوں کراس ڈومین سکرپٹنگ کے مسائل پیدا ہو جاتے ہیں۔ میں اس کے لیے ایک حل پر کام کر رہا ہوں، اور یہ حل ایک اردو ایڈیٹر یوزر سکرپٹ کا استعمال ہے۔ میں نے کئی سال قبل فائرفاکس کی گریز مونکی ایکسٹینشن کے لیے ایک اردو ایڈیٹر یوزر سکرپٹ تیار کی تھی، لیکن اب یہ صحیح کام نہیں کرتی ہے۔ میری کوشش ہوگی کہ جلد ایک نئی یوزر سکرپٹ تیار کر سکوں۔
براؤزر کمپیٹیبیلیٹی
اردو ایڈیٹر بکمارکلٹ اوپیرا براؤزر کے علاوہ باقی تمام نمایاں ویب براؤزرز انٹرنیٹ ایکسپلورر، فائرفاکس، گوگل کروم اور سفاری پر کام کرتا ہے۔ میں نے اسے ونڈوز، لینکس اور میکنٹاش او ایس ایکس میں کامیابی سے استعمال کرکے دیکھا ہے، حتی کہ یہ آئی پیڈ میں بھی درست کام کر رہا ہے۔ اس سے ظاہر ہوتا ہے کہ یہ آئی فون میں بھی ٹھیک چلے گا۔ اوپیرا براؤزر میں اگرچہ اردو ایڈیٹر بکمارکلٹ کام نہیں کرتا ہے، لیکن اردو ایڈیٹر یوزر سکرپٹ کی تیاری کے بعد اوپیرا میں بھی ہر ویب پیج پر اردو ایڈیٹر استعمال کرنا ممکن ہو جائے گا۔
ڈیویلپمنٹ اور مزید کام
اردو ایڈیٹر بکمارکلٹ کی ڈیویلپمنٹ کے لیے گوگل کوڈ پر ایک پراجیکٹ شامل کر دیا گیا ہے اور یہاں پر ہی اس کی ڈیویلپمنٹ کو ٹریک کیا جا سکتا ہے۔
جیسا کہ میں اس تحریر کے آغاز میں عرض کر چکا ہوں، اس بکمارکلٹ کا آئیڈیا مجھے گوگل ٹرانسلٹریشن بکمارکلٹ سے ہی آیا تھا اور اسی کے کوڈ سے میں سکرپٹ لوڈنگ کا مکینزم اخذ کیا ہے۔ علاوہ ازیں میں ذیل کے اوپن سورس پراجیکٹس سے بھی مفید آئیڈیاز حاصل کیے ہیں اور کئی مقامات پر مسائل حل کرنے میں ان سے مدد ملی ہے۔
JavaScript Graphical / Virtual Keyboard Interface
Javascript Virtual Keyboard
اردو ایڈیٹر بکمارکلٹ کی تیاری سے مجھے اردو ویب پیڈ اور اس پر مبنی دوسرے پلگ انز کو بہتر بنانے میں بہت مدد ملے گی۔ اردو ایڈیٹر کے آئندہ ورژنز اب تمام نمایاں براؤزرز پر کام کریں گے۔ میرا ارادہ ہے کہ ورڈپریس کے لیے اردو ایڈیٹر پلگ ان کی اپڈیٹ جلد فراہم کروں۔ اس کے علاوہ میں ایک اردو ایڈیٹر یوزر سکرپٹ تیار کرنے کا ارادہ بھی رکھتا ہوں جو کہ اوپیرا اور فائرفاکس براؤزرز میں استعمال کی جا سکے گی اور اس کے ذریعے بلاگر ڈاٹ کام بلاگز کے تبصرے کے خانے میں بھی اردو لکھنا ممکن ہوگا۔
اردو ایڈیٹر بکمارکلٹ کو میں اکثر گوگل کے سرچ باکس میں استعمال کرتا رہا ہوں اور یہ بھی میرے لیے ایک پسندیدہ مشغلہ رہا ہے۔ کچھ سال قبل گوگل میں اردو کے الفاظ تلاش کرنے پر نہ ہونے کے برابر تلاش کے نتائج برآمد ہوتے تھے جبکہ آج کل مختلف صورتحال نظر آتی ہے۔ اس طرح تلاش کرنے پر کئی نئی اور مفید اردو سائٹس بھی دریافت ہوتی ہیں۔
اردو ایڈیٹر بکمارکلٹ کے بارے میں آراء اور اس کو بہتر بنانے کے لیے تجاویز کے لیے میں آپ کے تبصروں کا منتظر رہوں گا۔
والسلام
کسی ابو بکر نامی صاحب نے سٹار ڈکشنری نامی اطلاقیے کے لیے انگریزی اردو لغت تیار کی تھی جو ایک عرصہ سے میرے استعمال میں ہے، سوچا عوام الناس کو بھی اس سے مستفید کیا جائے چنانچہ اس کا ایک ڈِب پیکج تیار کیا ہے جس کے ذریعے سٹار ڈکشنری بھی نصب ہوجائے گی اور ابو بکر انگریزی اردو لغت بھی، یاد رہے کہ پیکج میں صرف لغت ہے، سٹار ڈکشنری سوفت ویئر کا تازہ ترین نسخہ گوداموں سے خود ہی ڈاؤنلوڈ ہوکر نصب ہوگا چنانچہ اس پیکج کو نصب کرنے کے لیے آپ کا انٹرنیٹ سے متصل ہونا ضروری ہے تاہم اگر سٹار ڈکشنری آپ کے پاس پہلے ہی نصب ہے تو پھر صرف لغت ہی نصب ہوگی.
ڈاؤنلوڈ: یہاں سے
ابو شامل صاحب نے یہاں منادی لگائی کہ جناب کمپیوٹر پر اردو انسٹال/فعال کرنا نئے حضرات کے لیے بہت مشکل کام ہے چنانچہ ماہرین میدان میں کودیں اور یہ مسئلہ حل کرتے ہوئے اس عمل کو آسان بنائیں تاکہ کمپیوٹر پر اردو کی ترویج میں آسانی اور اضافہ ہو، ابو شامل صاحب کی اس منادی پر محمد بلال صاحب نے ونڈوز اور میں نے لینکس کے لیے لبیک کہا اور یہ مسئلہ حل کرنے کا وعدہ کیا، اور الحمد للہ ہم دونوں حضرات ہی سرخرو ہوئے، محمد بلال نے پاک اردو انسٹالر پیش کیا اور منحوس ونڈوز کے تمام رائج نسخوں میں اردو کی معاونت اور کیبورڈ کو فعال کرنا آسان تر کردیا، مجھے بوجوہ ذرا تاخیر ہوگئی لیکن دیر آید درست آید کی مصداق بالآخر لینکس اردو انسٹالر پیشِ خدمت ہے.
لینکس پر لینکس اردو انسٹالر نصب کرنے پر اردو کے کچھ اہم فونٹس، ونڈوز کے فونٹس اور اردو کیبورڈ خود بخود فعال ہوجاتا ہے، پیکج کی تنصیب کے بعد اردو اور ونڈوز کے فونٹس تمام اطلاقیوں میں فوراً دستیاب ہوجائیں گے جیسے لائبر آفس، ٹیکسٹ ایڈیٹر وغیرہ، تاہم کیبورڈ کو فعال کرنے کے لیے آپ کو کم سے کم لاگ آؤٹ کر کے دوبارہ لاگ ان ہونا ہوگا جس کے بعد آلٹ شفٹ Alt+Shift دباکر اردو اور انگریزی کیبورڈ کے درمیان منتقل ہوا جاسکے گا، کیبورڈ کے لیے کوئی انڈیکیٹر نظر نہیں آئے گا کیونکہ لینکس کے بہت سارے ڈیسک ٹاپس ہیں اور ان سب کی سیٹنگز کا احاطہ کرنا بہت مشکل امر ہے، تاہم میں نے نوٹ کیا ہے کہ گنوم 3 پر پیکج کی تنصیب کے بعد کیبورڈ انڈیکیٹر خود بخود اوپر کے پینل میں نمودار ہوجاتا ہے:
لینکس کی دنیا میں چونکہ ڈبین اور ریڈ ہیٹ کے خاندانوں کی ڈیسٹریبیوشنز کا ہی زیادہ رواج ہے اور دونوں کا پیکجنگ سسٹم مختلف ہے لہذا لینکس اردو انسٹالر ڈِب اور آر پی ایم پیکج کی صورت میں جاری کیا جارہا ہے جن کی تنصیب صرف ڈبل کلک کر کے کی جاسکتی ہے، ڈِب پیکج ڈبین خاندان کی ڈیسٹریبیوشنز کے لیے ہے جیسے ابنٹو، کبنٹو، زبنٹو، لبنٹو، لینکس منٹ وغیرہ، جبکہ آر پی ایم پیکج ریڈ ہیٹ خاندان کی ڈیسٹریبیوشنز کے لیے ہے جیسے فیڈورا، مینڈریوا، پی سی لینکس وغیرہ..
یاد رہے کہ لینکس اردو انسٹالر کی تنصیب کے لیے کسی قسم کی کوئی انحصاریاں نہیں ہیں اور نا ہی یہ کسی مخصوص ڈیسک ٹاپ کے لیے ہے یعنی آپ کا ڈیسک ٹاپ گنوم ہو، کیڈی ہو، ایکسفس ہو، ایلکسڈی ہو یا بھلے ہی اوپن بکس ونڈو منیجر ہو، اس سے کوئی فرق نہیں پڑتا.
ڈاؤنلوڈ:
لینکس اردو انسٹالر برائے ڈبین خاندان
لینکس اردو انسٹالر برائے ریڈ ہیٹ خاندان
میں ڈِب پیکج کی ٹیسٹنگ کے لیے نبیل بھائی اور آر پی ایم پیکج کی ٹیسٹنگ کے لیے ابن سعید بھائی کا شکریہ ادا کرتا ہوں 
لینکس اردو انسٹالر اردو محفل کی چھٹی سالگرہ کے موقع پر جاری کیا جارہا ہے
دعاء کی درخواست.
ہم اردو سیارہ کے پردے کے پیچھے در پیش کچھ مسائل کا بھی ذکر کر دینا مناسب خیال کرتے ہیں۔
پہلی بات تو یہ کہ سیارہ کا ضوابط نامہ تجدید چاہتا ہے۔ اس کی کئی باتیں مبہم ہیں ان میں مزید وضاحت و صراحت کی ضرورت ہے۔ موجودہ نکات کے تحت کئی معاملات میں خط فاصل کا تعین کر پانا ایک مشکل امر ثابت ہو رہا ہے۔ نتیجتاً دو الگ الگ لوگ ان اصولوں کے تحت الگ الگ موقف اپنا سکتے ہیں۔ اس ابہام کو دور کرنے کی اشد ضرورت ہے۔ اور اس کا حل ہم نے یہ سوچا ہے کہ ایک پینل کے ذریعہ اردو سیارہ پالیسی کا ایک نیا ڈرافٹ مرتب کر کے اس پر اردو بلاگستان کے احباب کی رائے لی جائے اور باہمی مشاورت کے بعد اس کو ایک ایسی شکل دی جائے جس پر زیادہ سے زیادہ احباب کا اتفاق ہو۔ اس کے تحت آزادئ اظہار رائے کے حدود کے ساتھ ساتھ سیارہ میں شمولیت کے لئے متعین کم سے کم مدت اور فعالیت کے معیار پر بھی نظر ثانی کی ضرورت ہے۔
اردو سیارہ کو فی الحال پلینٹ نامی سافٹوئیر کی مدد سے چلایا جا رہا ہے، جو کہ نظامت و ادارت کے لحاظ سے بہت ہی تکلیف دہ ثابت ہو رہا ہے۔ اس کام کے لئے اس میں کوئی ویب انٹرفیس نہیں بلکہ کوئی بھی تبدیلی کرنے کے لئے اردو سیارہ کے کوڈ بیس میں تبدیلی کرنی پڑتی ہے جو کہ ایک صبر آزما کام ہے۔ لہٰذا یہ کام محض وہی کر سکتے ہیں جن کو اردو سیارہ کے کوڈ بیس تک رسائی اور تبدیلیوں کا اختیار حاصل ہے۔ ہم ایسے متبادل نظام پر کام کر رہے ہیں جس میں مراسلات کے درجے پر رپورٹنگ اور ادارت ممکن ہو۔ ساتھ ہی صارفین سیارہ کو رپورٹ کردہ پیغامات اور بعض بلاگران کے تمام مراسلے فلٹر کرنے کی سہولت دستیاب ہو۔ اس کے بعد اردو بلاگستان کے چند فعال اراکین کو سیارہ کی ادارت کی ذمہ داری بھی سونپی جا سکے گی، جو کہ فی الوقت چاہتے ہوئے بھی ممکن نہیں۔
اردو سیارہ کی نظامت الگ الگ وقتوں میں الگ الگ لوگوں کے ذمہ رہی ہے۔ اور سبھی ناظمین کے نظروں میں سیارہ کے قواعد آزادئی اظہار رائے کا معیار اور خط فاصل کا مختلف ہونا کوئی غیر معمولی یا غیر فطری بات نہیں۔ نیز یہ کہ کوئی فیصلہ کرتے ہوئے اس معالمے کے بیک گراؤنڈ سے آگاہی اور ناظم کی ذہنی کیفیت مختلف انداز سے اثر انداز ہو سکتے ہیں۔ ان وجوہات کے باعث سیارہ کے بعض فیصلوں میں عدم مطابقت پائی جاتی ہے۔ نیز یہ کہ اردو محفل اور اردو سیارہ میں اس خط فاصل کا معیار مختلف ہے۔ اردو بلاگستان میں بے شمار ایسی تحریریں ہیں جن کو اردو محفل میں جگہ نہیں مل سکتی۔
ماضی میں کافی عرصہ تک سیارہ کی نظامت مکمل تعطل کا شکار رہی اس کے بعد ہم نے اس ذمہ داری کو سنبھالنے کی کوشش کی۔ اب عموماً ہم ہی ان معاملات کو دیکھتے ہیں یا کبھی کبھار برادم نبیل بھی اس میں تبدیلیاں کرتے ہیں۔ ہماری کوشش ہوتی ہے کہ کوئی بڑا فیصلہ لینے سے قبل مشاورت کر لی جائے لیکن یہ کئی دفعہ ممکن نہیں ہو پاتا۔
پچھلے دنوں سیارہ ورکشاپ میں ہم نے بیک وقت سو سے زائد درخواستوں کو پروسیس کیا اس کے بعد سے ہر ہفتے دسیوں نئی درخواستیں موجود ہوتی ہیں۔ جن میں سے بیشتر ڈپلیکیٹ ہوتی ہیں اور کئی ایسی ہوتی ہیں کہ بلاگ شروع کرنے کے دوسرے ہی دن بھیجی گئی ہوتی ہیں۔ اتنے ساری ای میلز کو پراسیس کرنا اور ایک ایک بلاگ پر جا کر یہ فیصلہ لینا کہ کیا وہ شمولیت کے شرائط پر کھرا اترتا بھی ہے یا نہیں، یہ ایک انتہائی صبر طلب اور وقت طلب کام ہے۔ کئی دفعہ اس میں بھی لغزش کا امکان رہتا ہے۔ اس کے علاوہ کوئی بلاگ غیر فعال یا ناپید ہو جائے تو صاحبان بلاگ اس کی رپورٹنگ ضروری نہیں سمجھتے۔ ایسے بلاگوں شناخت کر کے ان کا اخراج بھی سہل کام نہیں۔ اس کے باوجود اردو بلاگستان کا بڑھتا ہجوم ہمارے لئے انتہائی مسرت کا باعث ہے اور ہمیں اس کے لئے کام کرتے رہنے پر اکسانے کا سبب بھی۔
کسی بھی ناظم کی ذاتی رائے بطور ناظم اس کی رائے سے مختلف ہونا کوئی تعجب خیز امر نہیں۔ اور اس میں کوئی مضائقہ بھی نہیں۔ اس کے علاوہ، اگر کوئی فیصلہ کسی کی فکر کے مطابق نہ ہو تو اس کے تئین عدم اطمینان، غیر منصفی کا گمان اور اپنے خیالات کی تائید کے لئے شواہد کی تلاش ایک فطری عمل ہے۔ لیکن خوش گمانی، مثبت انداز فکر اور رواداری ایک مستحسن عمل ہے۔ کئی دفعہ پرانی باتیں کھنگالتے ہوئے اس وقت کا سیاق و سباق اور دیگر غیر مذکور عوامل رہ جاتے ہیں اور ان پر حالیہ ماحول کے تحت نتائج اخذ کرنا کسی اور جانب اشارہ کر سکتا ہے۔
اردو ویب محض ایک ویب سائٹ نہیں بلکہ ایک ادارہ ہے جو اردو کی ترقی کے لئے کئی منصوبوں پر ماضی و حال میں کام کرتا رہا ہے اور اسکوپ بڑھ جانے پر کسی منصوبے کو علیحدہ شناخت اور نظامت کے ساتھ متعارف کرانا کوئی انوکھی بات نہیں۔ کئی دفعہ یہ منصوبے اردو ویب کے اخراجات پر پروان چڑھتے ہیں اور کئی دفعہ مکمل طور پر علیحدہ کر دیئے جاتے ہیں۔ دیگر کئی منصوبوں کے ساتھ ساتھ اردو کوڈر لینکس فورم بھی ایسا ہی ایک منصوبہ ہے۔ لیکن کسی منصوبے کے تحت کسی سے رابطہ اور دیگر معاملات میں ایک دوسرے کی پشت پناہی دو الگ الگ باتیں ہیں۔ ہم اردو کے تمام خادمین کے لئے نرم گوشہ رکھتے ہیں۔ نیز نظریاتی، مسلکی و قومی اختلافات کے باوجود اردو کے تئیں ہر کسی کی صلاحیتوں سے استفادہ کی وکالت کرتے ہیں۔
ہم ان سبھی احباب کے مشکور ہیں جنھوں نے اپنی شکایات و تحفظات کو پوری حسن و خوبی اور تحمل کے ساتھ برتا اور ان احباب کے جذبات کی قدر کرتے ہیں جنھوں نے طنزیہ لہجہ اور غیر مناسب الفاظ کا سہارا لیا۔ ہماری کسی بات سے کسی کو ٹھیس پہونچی ہو تو ہم اس کے لئے معافی کے خواستگار ہیں۔ امید کہ احباب اپنے دامن عفو میں ہمارے لئے کشادگی ضرور پائیں گے۔
ان سب کے باوجود بھی کسی کو اردو ویب کے اردو کے تئیں خلوص کو لیکر بدگمانیاں ہوں تو ہمیں اس بات کا صدمہ ضرور ہوگا پر ہم اس کی شکایت نہیں کریں گے۔ ہم امید کرتے ہیں کہ احباب کی آراء کو پیش نظر رکھتے ہوئے مستقبل میں بہتر کار کردگی، ٹرانسپیرینسی اور عدل و مساوات کے قیام کی کوشش کریں گے۔
گوگل سکرپٹ کنورٹر میں اردو بھی شامل
گوگل سکرپٹ کنورٹر رومن عبارت کو تحریری شکل میں تبدیل کرنے کے لیے ایک ٹول ہے جو ابھی تک صرف ہندی، تلگو اور تامل وغیرہ کے لیے دستیاب تھا۔ اب اس میں اردو کی سپورٹ بھی شامل کر دی گئی ہے۔ اس کے ذریعے رومن اردو کو یونیکوڈ اردو میں آسانی سے کنورٹ کیا جا سکے گا۔
کچھ عرصہ قبل میں نے گوگل انڈک ٹرانسلٹریشن اے پی آئی کو استعمال کرکے اس سے ملتی جلتی ایک اپلیکیشن بنانے کی کوشش کی تھی۔ اس کے بارے میں یہاں پوسٹ کیا تھا اور اس کا ڈیمو یہاں موجود ہے۔ یہ ڈیمو فائرفاکس میں درست کام کرتا ہے۔ میں ایک مرتبہ پھر اسی رومن اردو میں لکھے ہوئے متن کو تحریری اردو میں تبدیل کرنے کا تجربہ کرکے دیکھتا ہوں کہ کونسی سروس بہتر کام کر رہی ہے۔ رومن اردو میں لکھا گیا متن ذیل میں ہے:
Kitny dhoom dhaam se manaya jata he 14 August ka din, agar me ghalat na kahoon tau shaid Eid k din se bhi ziada Ronaq lagi hoti he. Hamar Jashan-e-Azadi manany ka tareeqa bhi duniya me sab se anookha he. Hum har wo kaam kar ke jashan manatay aur khushi mahsoos karty hain, jis se doosro ko takleef ho jis se doosro ko bechainy ho, jis se doosry ko chirchira uthain. Maslan motor bike bina silencer chalna, one wheel show. Racing oonchi awaz me music wagher waghera. Wo mulak jahan bijli ki kami he aur 14-16 se ghatny ki load shedding ho rahi ho jahan ki awam bijli naam ko taras ho rahi, jahan ki economy bijli k hatho khatam hoti ja rahi ho. Waha Jashn-e-Azadi pe aisy noora barsa jaisy hum Bijli khud kafeel ho chuky. Jaisy iss rang – o – k seelab me beh kar sab badal jayee ga.
گوگل ٹرانسلٹریشن اے پی آئی والے پروٹوٹائپ کے ذریعے ذیل کا متن حاصل ہوتا ہے:
کتنے دھوم دھام سے منایا جاتا ہے ١٤ اگست کا دِن اگر مے غلط نہ کہوں تو شائد عید ک دیں سے بھی زیادہ رونق لگی ہوتی ہے ہمار ظَثہَنےاذَدِ منانے کا طریقہ بھی دنیا مے سب سے انوکھا ہے ہم ہر وو کام کر کے جشن مناتے اور خوشی محسوس کرتے ہَِن جس سے دوسرو کو تکلیف ہو جس سے دوسرو کو بچیننے ہو جس سے دوسرے کو چڑچڑا ُطَِن مسلان موٹر بکے بنا سیلنکر چَلنَ انے وہیل ثہوی رکنگ اونچی آواز مے مسک وغیر یَغےڑَ وو ملک جہاں بجلی کی کمی ہے اور ١٤-١٦ سے گھٹنے کی لوڈ شیدڈنگ ہو رہی ہو جہاں کی اوم بجلی نام کو ترس ہو ڑَہِ جہاں کی اونومنے بجلی ک ہاتھو ختم ہوتی جا رہی ہو وہا ظَثہنےاذَدِ پی ایسے نورا برسا جیسے ہم بجلی خود کفیل ہو چُکی جیسے اسس رنگ و ک سیلاب مے بہ کر سب بدل جیے گَ
اور گوگل سکرپٹ کنورٹر کے ذریعے ذیل کا متن حاصل ہوتا ہے:
کتنے دھوم دھام سے منایا جاتا ہے 14 اگست کا دیں, اگر مے غلط نہ کہوں تو شائد عید ک دیں سے بھی زیادہ رونق لگی ہوتی ہے. ہمار جشن-ا-آزادی منانے کا طریقہ بھی دنیا مے سب سے انوکھا ہے. ہم ہر وو کام کر کے جشن مناتے اور خوشی محسوس کرتے ہیں, جس سے دوسرو کو تکلیف ہو جس سے دوسرو کو بچیننے ہو, جس سے دوسرے کو چڑچڑا اٹھائیں. مسلان موٹور بکے بنا سیلنکر چلنا, انے وہیل شوو. رکنگ اونچی آواز مے مسک وغیر وغیرہ. وو ملک جہاں بجلی کی کمی ہے اور 14-16 سے گھٹنے کی لوڈ شیدڈنگ ہو رہی ہو جہاں کی اوم بجلی نام کو ترس ہو رہی, جہاں کی یکونومے بجلی ک ہاتھو ختم ہوتی جا رہی ہو. وہا جشن-ا-آزادی پی ایسے نورا برسا جیسے ہم بجلی خود کفیل ہو چکے. جیسے اسس رنگ – و – ک سیلاب مے بہ کر سب بدل جیے گا.
بالا کے تقابل سے ظاہر ہوتا ہے کہ گوگل سکرپٹ کنورٹر بہتر کام کرتا ہے۔ اب انتظار اس بات ہے کہ یہ کنورٹر بھی کسی اے پی آئی کے ذریعے دوسری سائٹس میں استعمال کے لیے دستیاب ہو جائے۔
گوگل کی حالیہ پیش رفت کے تحت اب گوگل سرچ کی مرکزی سائٹ میں سرچ بار کے ساتھ ایک عدد ورچؤل کی بورڈ بھی نصب کر دیا گیا ہے جس سے کئی زبانوں میں ٹائپ کر پانا ممکن ہوگا۔ اس سے قبل گوگل سرچ میں ٹرانسکرپشن کے تحت منتخب شدہ زبان کے سجیشن دستیاب کرائے جاتے تھے جو کہ کافی معاون ہوتے تھے۔ فی الحال اس خدمت سے مستفید ہونے والی 35 زبانوں میں اردو موجود نہیں ہے۔
فی الحال اس میں اردو کی بورڈ شامل نہیں ہے۔ اس ربط پر جا کر اردو کی بورڈ کی شمولیت کے لیے ووٹ ڈالا جا سکتا ہے۔تمام دوستوں سے گزارش ہے کہ مذکورہ ربط پر جا کر اردو کی بورڈ کی شمولیت کے لیے ووٹ ڈالیں۔
آج محفل فورم کے ایک رکن فرخ منظور کی نشاندہی پر جی میل میں اردو ٹرانسلٹریشن کی سپورٹ کے بارے میں علم ہوا۔ یہ یقیناً نہایت اہم پیشرفت ہے اور اس طرح اردو میں ای میل بھیجنا نہایت آسان ہو گیا ہے۔ میں اس پوسٹ میں جی میل میں اردو ٹرانسلٹریشن کی فیچر کو فعال کرنے اور اس کے استعمال کے بارے میں معلومات فراہم کر رہا ہوں۔
اپنے جی میل اکاؤنٹ میں اردو ٹرانسلٹریشن کو انیبل کرنے کے لیے سب سے پہلے Settings پر کلک کرکے سیٹنگز والے صفحے کو سامنے لے آئیں۔ اس کے بعد ذیل کی تصویر کے مطابق Show all language options پر کلک کریں جس سے چند مزید آپشنز ظاہر ہو جائیں گی۔
اضافی لینگویج آپشنز ظاہر ہونے کے بعد Enable Transliteration چیک باکس کو چیک کر دیں اور اس کے سامنے والے ڈراپ ڈاؤن لسٹ باکس میں Urdu کا انتخاب کر لیں جیسا کہ ذیل کی تصویر میں دکھایا گیا ہے۔ اس کے علاوہ دائیں سے بائیں ایڈیٹنگ کے لیے Right-to-left editing support on کو بھی منتخب کر لیں۔ اور اس کے بعد ان سیٹنگز کو محفوظ کر لیں۔
آپ کے جی میل اکاؤنٹ میں ٹرانسلٹریشن انیبل ہونے کے بعد جی میل کے ای میل ایڈیٹر کی ٹول بار میں ایک بٹن کا اضافہ ہو جائے گا جس پر کلک کرکے آپ اردو ٹرانسلٹریشن کا انتخاب کر سکتے ہیں جیسا کہ ذیل کی تصویر میں دکھایا گیا ہے۔
اردو ٹرانسلٹریشن کا انتخاب کرنے کے بعد آپ جی میل کے ایڈیٹر میں براہ راست ٹرانسلٹریشن کے ذریعے اردو لکھ سکتے ہیں جیسا کہ ذیل کی تصویر میں دکھایا گیا ہے۔
